मधेसी मोर्चाले आह्वान गरेको नेपाल बन्दले जनजीवन प्रभावित

संयुक्त लोकतान्त्रिक मधेसी मोर्चाले आह्वान गरेको नेपाल बन्दका कारण पूर्वाञ्चलको जनजीवन प्रभावित भएको इन्सेक पूर्वाञ्चल क्षेत्रीय कार्यालय, विराटनगरले जनाएको छ ।

मोरङ जिल्ला प्रतिनिधि इन्दिरा भट्टराईका अनुसार विराटनगर बजार तथा रङ्गेली क्षेत्र प्रभावित बढी प्रभावित भएको छ । बन्दका कारण विराटनगरमा बजार, यातायात विद्यालय पूर्ण रूपमा बन्द रहेका छन् । मोर्चाका कार्यकर्ताहरूले विराटनगर, रङ्गेली, हाटखोलालगायतका विभिन्न स्थानमा टायर बालेर यातायात अवरोध गर्नुका साथै विरोध प्रदर्शनसमेत गरेका छन् ।

सुनसरी जिल्ला प्रतिनिधि शेखर ढकालका अनुसार नेपाल बन्दको सुनसरीमा मिश्रित प्रभाव देखिएको छ । बन्दका कारण सुनसरीमा निजी र सार्वजनिक सवारी चल्न सकेका छैनन् । छिटफुट रूपमा मोटरसाइकल भने चलेका थिए । इटहरी, तरहरा, धरानलगायतका बजार र पसल बन्द भएनन् । दुहवी, इनरुवा क्षेत्रमा पनि बन्दको असर परेन । बन्दका कारण विद्यालय र क्याम्पसहरू फागुन २७ गते पनि ठप्प रहे । उद्योग र कलकारखानामा पनि बन्दको प्रभाव परेको छ । सुनसरीको इनरुवा, दुहवी, लौकही लगायतका ठाउँमा बन्दकर्ताहरू बाटोमा बसेका छन् । इटहरी चौकमा भने सङ्घीय समाजवादी फोरमका कार्यकर्ताहरू बसेर सवारी चल्न दिएका छैनन् ।

सिरहा जिल्ला प्रतिनिधि दुर्गा परियारका अनुसार संयुक्त मधेसी मोर्चाले फागुन २७ गत गरेको नेपाल बन्दले सिरहाको जनजीवन प्रभावित हुन पुगको छ । सिरहालगायत, लहान, मिर्चैया, गोलबजारका बजार, पसल, विद्यालय, कलकारखाना तथा सरकारी कार्यालय र यातायात ठप्प रहेका छन् । बन्दका कारण लामो तथा छोटो दुरीका सवारी साधन नचल्दा गन्तव्यमा जाने यात्रुहरू सास्तीमा परेका छन् । त्यसैगरी सिरहाको लहानमा मोर्चाका नेता तथा कार्यकर्ताहरूले बिहानैदेखि टायर बालेर विरोध प्रदर्शन गरिरहेका छन् । जिल्ला प्रहरी कार्यालय सिरहाका डिएसपी विश्वमणी पोखरेलले मोर्चाको बन्दका कारण जनजीवन ठप्प भए पनि कुनै अप्रिय घटना नभएको जानकारी दिए ।

कपिलवस्तु जिल्ला प्रतिनिधि नन्दराम पौडेलका अनुसार संयुक्त लोकतान्त्रीक मधेसी मोर्चा तथा सङ्घीय गठबन्धनले आह्वान गरेको नेपाल बन्दको क्रममा कपिलस्तुको जहदीमा मोर्चाका कार्यक्रताले एउटा मोटरसाइकल तोडफोड गरेका छन् । ४ नंबाट तौलिहवातर्फजाँदै गरेको लु ६ प ४१४८ न को मोटर साइकललाई बाटोमा बसेका मोर्चाका कार्यकर्ताले बन्द अवज्ञा गरेको भन्दै तोडफोड गरेका हुन् । मोर्चाले दिन भर जिल्लाका विभिन्न स्थानमा प्रदर्शन गर्नुको साथै सडकमा टायर बालेर सडक अवरुद्ध पारेका थिए । जिल्ला सदरमुकाम तौलिहवा, कृष्णनगर बजार, चन्द्रौटा, जहदी पकडी महाराजगन्जलगायतका स्थानमा बिहानैदेखि विद्यालय, यातायात, बजार उद्योगधन्दा बन्द रहेका छन् ।

सङ्घीय गठबन्धनले गरेको आमहड्तालका कारण बाँके, बर्दिया र दाङ जिल्लाको जनजीवन प्रभावित भएको इन्सेक मध्यपश्चिमाञ्चल क्षेत्रीय कार्यालय नेपालगञ्जले जनाएको छ । यसअघि मधेसी मोर्चाले गरेको बन्दका कारण फागुन २५ र २६ गते पनि बाँके, बर्दिया र दाङ जिल्ला प्रभावित बनेको थियो ।

बर्दिया जिल्ला प्रतिनिधि मानबहादुर चौधरीका अनुसार आमहड्तालका कारण बर्दिया जिल्लाको जनजीवन प्रभावित भएको छ । बन्दका कारण जिल्लाबाट चल्ने लामो तथा छोटो दुरीका सवारी साधन चलेका छैनन् । सदरमुकाम गुलरिया बजार पूर्ण रूपमा बन्द रहेको छ । साथै सदरमुकाम गुलरिया र मोहम्मदपुर गाविसका सरकारी तथा निजी विद्यालय पनि सञ्चालन भएनन । सुरक्षाका लागि प्रहरीको टोली ठाउँ ठाउँमा रहेपनि आन्दोलनकारीहरूको समूह कतै देखिएनन् ।

दाङ जिल्ला प्रतिनिधि जेएन सागरका अनुसार बन्दको बन्दका कारण लमही बजार खुलेको छैन भने पूर्व पश्चिम महेन्द्र राजमार्गमा लामो तथा छोटो दुरीका सवारी साधन सञ्चालन भएनन् ।

बाँके जिल्ला प्रतिनिधि विनोद पाण्डेका अनुसार बन्दका कारण जिल्लाका निजी तथा सरकारी विद्यालयमा पठनपाठन हुन सकेन ।

सुर्खेत, प्यूठान, रोल्पालगायत मध्यपश्चिमाञ्चल क्षेत्रका अन्य जिल्लामा बन्दको प्रभाव नपरेको सम्बन्धित जिल्लाका इन्सेक प्रतिनिधिले जनाएका छन् ।

महोत्तरी जिल्ला प्रतिनिधि अजयकुमार साहका अनुसार नेपाल बन्दको प्रभाव महोत्तरीमा न्यून देखिएको छ । बजार, कार्यालय, शिक्षण संस्थाहरू निर्वाध रूपले सञ्चालन भएका छन् भने सार्वजनिक यातायातका साधन भने सञ्चालन हुन सकेनन् ।

कास्की जिल्ला प्रतिनिधि संगीता भाटका अनुसार कास्कीमा नेपाल बन्दको प्रभाव पोखरामा सामान्य परेको छ । बन्दका कारण अधिकांश पसल बन्द भएपनि निजी तथा सरकारी सवारी साधन, एम्बुलेन्स र टुरिष्ट बस निर्वाध रूपमा चलेका छन् । सार्वजनिक सवारी साधन छिटफुट रूपमा सञ्चालन भएका छन् । विद्यालयमा पठनपाठन ठप्प रहेको र बन्दका कारण कुनै पनि अप्रिय घटना नभएको जिल्ला प्रहरी कार्यालयका डिएसपी खड्कबहादुर खत्रीले बताए ।


अनलाइन डेस्क