समाचारहरू

मधेसी मोर्चामा आवद्ध सांसदहरूले व्यवस्थापिका संसदको फागुन २७ गतेको बैठक बहिष्कार गरेका छन् ।

संसद बैठक सुरू हुनासाथ सङ्घीय समाजवादी फोरम नेपालका सांसद अशोक राईले सप्तरी घटनामा सरकारले अनावश्यक बल प्रयोग गरी नागरिकको हत्या गरेको भन्दै दोषीलाई कारबाहीको माग गरे । सांसद राईले आफ्नो कुरा राखे लगत्तै मोर्चामा आवद्ध सांसदहरूले नारबाजी गर्दै रोष्टम घेराउ गरी संसद बैठक बहिष्कार गरेका हुन् ।

यसैगरी संसदमा बोल्दै माओवादी केन्द्रका सांसद अग्निप्रसाद सापकोटाले भारतीय पक्षबाट नेपालको राष्ट्रियतामाथि पटक-पटक प्रहार भएको भन्दै कञ्चनपुर घटनाका दोषीलाई कारबाही गर्न माग गरे ।

राप्रपाकी सांसद कुन्तीकुमारी शाहीले कञ्चनपुर घटनामा कुटनीतिक दबाव दिई दोषीलाई कारबाही गर्न माग गरिन् । उनले भारतीय पक्षबाट सिमा मिचिएको र त्यहाँ बसोबास गर्ने नेपालीहरू अपमानित हुनुपरेको भन्दै भारतीय राजदुतावासद्वारा जारी विज्ञप्तिको आलोचना गरिन् ।

एमाले सांसद प्रेम आलेले कञ्चनपुरमा भारतीय सुरक्षाकर्मीको गोलीबाट नेपाली नागरिकको हत्या हुँदासमेत सरकार लाचार भएर बसेको आरोप लगाउँदै घटनाको छानबिन गर्न माग गरे ।

मधेसी जनअधिकार फोरम लोकतान्त्रिकका सांसद योगेन्द्र चौधरीले नेपाली भूमिमा प्रवेश गरी एसएसबीले नेपाली नागरिकको हत्या गर्ने कुरा सामान्य नरहेको भन्दै कञ्चनपुर घटनामा मारिएका गोविन्द गौतमलाई शहीद घोषणा गर्न माग गरे ।

विवेक ढुङ्गाना