समाचारहरू

संयुक्त लोकतान्त्रिक मधेसी मोर्चाले आह्वान गरेको मधेस बन्दको दोस्रो दिन फागुन २५ गते मध्यपश्चिमाञ्चल क्षेत्रका बाँके, बर्दिया र दाङ जिल्लाको जनजीवन प्रभावित भएको इन्सेक मध्यपश्चिमाञ्चल क्षेत्रीय कार्यालयले जनाएको छ ।

इन्सेक बर्दिया जिल्ला प्रतिनिधि मानबहादुर चौधरीका अनुसार बन्दका कारण गुलरिया बजार पूर्ण रूपमा बन्द रह्यो । जिल्लाबाट सञ्चालन हुने लामो तथा छोटो दुरीका सवारी साधन पूर्व पश्चिम महेन्द्र राजमार्ग र गुलरिया नेपालगञ्ज हुलाकी सडकमा नचल्दा यात्रुहरू अलपत्र परे । बन्दकर्ताले एम्बुलेन्स र विवाहका साधन चल्न दिएका थिए ।

इन्सेक बाँके जिल्ला प्रतिनिधि विनोद पाण्डेका अनुसार बन्दका कारण नेपालगञ्ज, राझा, सोनपुरलगायतका बजार बन्द रहे । जिल्लाबाट सञ्चालन हुने लामो तथा छोटो दुरीका सवारी साधन सञ्चालन हुने सकेनन् । बन्दका कारण भारतबाट आउने मजदुरहरू पैदल तथा महङ्गो भाडा तिरेर रिक्सामा गन्तव्यतिर जान बाध्य भएका थिए ।

इन्सेक दाङ जिल्ला प्रतिनिधि जेएन सागरका अनुसार बन्दका कारण पूर्व पश्चिम महेन्द्र राजमार्गमा लामो तथा छोटो दुरीका सवारी साधान सञ्चालन भएनन् । बन्दका कारण लमही बजार पूर्ण रूपमा बन्द रह्यो ।

सप्तरी घटनाको विरोधमा संयुक्त लोकतान्त्रिक मधेसी मोर्चाले आहृवान गरेको तराई/मधेस बन्दको आज दोश्रो दिन मध्यमाञ्चल क्षेत्र अन्तर्गतका जिल्लाहरूको जनजीवन प्रभावित भएको इन्सेक मध्यमाञ्चल क्षेत्रीय कार्यालयले जनाएको छ ।

इन्सेक सर्लाही जिल्ला प्रतिनिधि सन्तोष कुमार साहका अनुसार प्रहरीको गोली लागेर सप्तरीमा प्रदर्शनकारीको मृत्यु भएपछि त्यसको बिरोधमा उत्रिएका मधेसी मोर्चाका कार्यकर्ताहरूले सर्लाही सदरमुकाम मलङ्गवामा प्रदर्शन गरेका छन् । प्रदर्शनकारीले सडकमा टायर बालेर यतायातका साधन सञ्चालन हुन दिएनन् । बन्दका कारण सदरमुकाम मलङ्गवासहित प्रमुख व्यपारिक केन्द्र इश्वरपु र बरहथवा पनि बन्द भए । नेकपा एमालेको अभियान अन्तर्गत सर्लाहीको हरिपुरमा फागुन २६ गते हुने भनिएको कार्यक्रम स्थगित भएका कारण मोर्चाले आह्वान गरेको सर्लाही बन्द फिर्ता लिएको सदभावना पार्टीका जिल्ला अध्यक्ष प्रमोद साहले बताए ।

इन्सेक धनुषा जिल्ला प्रतिनिधि विनोद कुमार रविदासका अनुसार मधेसी मोर्चाको दुई दिन देखिको बन्दले जिल्लाको जनजीवन प्रभावित भएको छ । बन्दका कारण शैक्षिक संस्था, बजार, उद्योग र यातायात पूर्ण रूपमा ठप्प भए । मोर्चाले प्रेस विज्ञप्ति जारी गरी बन्द खुलेको जानकारी दिनुका साथै सङ्घीय गठबन्धनले फागुन २७ गते आह्वान गरेको बन्द होली पर्व परेकाले बन्द खुकुलो पार्ने निर्णय समेत गरेको जनाएको छ ।

इन्सेक महोत्तरी जिल्ला प्रतिनिधि अजय कुमार साहका अनुसार बन्दका कारण महोत्तरीको सदरमुकाम जलेश्वरको बजार, उद्योग धन्दा, कलकारखाना तथा यातायात ठप्प रहे । बन्दको प्रभाव जिल्लाको दक्षिणी भेगमा देखिए पनि उत्तरी भेगमा प्रभाव न्यून रहेको छ ।

महोत्तरीको जलेश्वरमा प्रत्येक वर्षमहिला तथा बालबालिका कार्यालयसहित विभिन्न संघ संस्थाले संयुक्त रुपमा नै विभिन्न कार्यक्रम गरी मनाउने गरेको नारी दिवस यस वर्षमनाइएन ।

इन्सेक रौतहट जिल्ला प्रतिनिधि विपिन गौतमका अनुसार मधेसी मोर्चाको बन्दका कारण जिल्लाको दक्षिण क्षेत्रको जनजीवन प्रभावित रहेको छ । दक्षिण क्षेत्रमा शिक्षण संस्था, यातायात, कलकारखाना, बजार र पसल बन्द रहे ।

इन्सेक कपिलवस्तु जिल्ला प्रतिनिधि नन्दराम पौडेलका अनुसार मधेस बन्दका कारण कपिलवस्तुको जनजीवन कष्टकर बनेको छ । बिहानदेखि जिल्ला सदरमुकाम भएर चल्ने कुनै पनि सवारीका साधन चल्न सकेनन् भने जिल्लाका सदरमुकाम तौलिहवा, बहादुरगञ्ज, चन्द्रौटा, कृष्णनगर, जहदी, पकडीलगायतका बजार दिनभर बन्द रहे । मधेसी मोर्चाका कार्यकर्ताले विभिन्न स्थानमा टायर बालेर सडक अवरुद्ध गरेर प्रदर्शनसमेत गरेका थिए ।

इन्सेक सिरहा जिल्ला प्रतिनिधि दुर्गा परियारका अनुसार लहान नपा ३ की ९ वर्षीया प्रिति कुशवाहा र ७ वर्षीया प्रिया कुशवाहालाई फागुन २४ गते साँझ प्रहरीले कुटपिट गरेको पीडित पक्षको आरोप छ ।

घरबाट खेल्नलाई बेलुका निस्किएका बालिकाहरूलाई लहान-३ स्थित गोधुली होटल नजिक सुरक्षामा खटिएका इलाका प्रहरी कार्यालय लहानका प्रहरीले कुटेको पीडित बालिकाले आरोप लगाइन् ।

साँझ मधेसी मोर्चाका कार्यकर्ताले सो ठाउँमा टायर बालेर प्रदर्शन गरेकाले प्रदर्शनकारीलाई लखेटने क्रममा प्रहरीले आफूहरूलाई कुटपिट गरेको पीडित बालिकाले बताइन् ।

कुटाइबाट प्रितिको गोडा तथा प्रियाको हात मर्किएको छ । दुवै बालिकाको उपचार लहान स्थित सप्तऋषी अस्पतालमा भएको छ ।

इलाका प्रहरी कार्यालय लहानका डिएसपी हिराबहादुर पाण्डेले घटना दुखद् भएको बताए । जिल्लाबाट सुरक्षाको लागि खटिएको प्रहरीबाट गल्ती भएको उनले बताए । डिएसपी पाण्डेले आइन्दा यस्तो घटना घट्न नदिन आफू सजग रहने र बालिकाहरूको उपचार खर्चको व्यवस्था मिलाउनेसमेत बताए ।

बन्दको दोस्रो दिन सिरहामा लाठी जुलुस प्रदर्शन गरिएको छ  । बन्दका कारण बजार, पसल, विद्यालय, कलकारखाना तथा सरकारी कार्यालय र यातायात बन्दले जनजीवन प्रभावित भएको छ ।

यसैबिच नेकपा एमाले सिरहाले फागुन २४ गते प्रेस विज्ञप्ति प्रकाशित गर्दै मधेसी मोर्चाले अराजक गतिविधि र अमानवीय क्रियाकलापहरू नरोके नेकपा एमाले चुप लागेर नबस्ने चेतावनी दिएको छ । एमाले सिरहाका अध्यक्ष प्रमोद यादवले प्रेस विज्ञप्ति जारी गर्दै यस्तो चेतवनी दिएका हुन् ।

मेची-महाकाली अभियानलाई विरोध गर्ने नाममा अराजक गतिविधि गर्दै मोर्चाले फागुन २४ गते लहानमा एमालेको क्षेत्रीय र नगर पार्टी कार्यालयमा तोडफोड र आगजनी गरी ६ लाख रुपियाँ बराबरको सामग्रीहरू जलाएको एमालेले जनाएको छ ।

अनलाइन डेस्क