मदानेचौरमा खानेपानीको अभाव

  ०७८ माघ ५ गते

सुर्खेतको भेरीगङ्गगा नगरपालिका–१० मदानेचौरका स्थानीयवासी खानेपानीको चरम अभाव खेपिरहेका छन् ।

वर्षाको समयमा केही सहज बनेपनि हिउँद अर्थात खुख्खा मौसममा एक सय ५० घर परिवारले पानीको अभाव व्यहोर्नुपरेको गुनासो गरेका छन् ।

‘वर्षामा त खासै समस्या हुदैँन, मङ्सिर यता नुहाउन, कपडा धुन त परको कुरा पशु र मान्छेलाई पिउने पानी जुटाउनै धौ धौ हुन्छ’ स्थानीय दिपक बीसीले भन्नुभयो, ‘डेढ सय बढी घर परिवारलाई एउटा मात्र धारा छ, घण्टौँ लाइन लाग्नुपर्छ ।’

हाल पिउने पानीको भाँडा लिएर तीन चार घण्टासम्म लाइनमा बस्नु पर्ने र चैत वैशाखमा काकाकुल हुने गरेको उहाँले दुःखेसो पोख्नुभयो ।

Photo20220119Skt1

स्थानीय सरकार र अन्य जनप्रतिनिधिलेसमेत आफूहरूको खानेपानी समस्याप्रति बेवास्ता गरेको स्थानीयवासीको गुनासो छ । निर्वाचनका बेला विकास र सेवा सुविधाको आश्वासन बाड्ने तर, निर्वाचन जितेर गएपछि फर्केर नहेरेको स्थानीय टीका खनालको गुनासो छ ।

‘चुनावको बेला दैला दैलामा आएर नेताले खानेपानी घर घरै व्यवस्था गर्छाै भनेर गए’ खनालले भन्नुभयो, ‘नेताहको मुहार फेरियो, हाम्रो दुःख जस्ताको तस्तै छ ।’

भेरीगङ्गा नगरपालिकाकी उपप्रमुख रेणु ढकालले समस्या समाधानका लागि आयोजनाको काम अघि बढेको बताउनुभयो ।

‘मदानेचौरवासीको खानेपानी समस्यालाई मध्यनजर गरेर आयोजनाको काम अघि बढिसकेको छ’ उहाँले भन्नुभयो,‘ट्यांकी निर्माण, पाइप खरिद भइसकेको छ, सकेसम्म यसै आर्थिक वर्षभित्र खानेपानी पुर्‍याउने गरी काम भइरहेको छ ।’

बस्तीको दीर्घकालिन रूपमा समस्या समाधान गर्ने गरी पानीको स्रोतको खोजी भइरहेकाले उपप्रमुख ढकालको भनाइ छ ।

Photo20220119Skt 3

Photo20220119Skt 2


पूर्णबहादुर खड्का