समाचारहरू

प्रतिनिधि सभा क्षेत्र नम्बर २ को प्रदेश सभा ख तर्फ प्रदेश सभाको दुईओटा मतदान केन्द्रको मतपेटिकाको सिल तोडिनुका साथै मतपत्र धेरै भेटिएपछि मतगणना रोकिएको छ । चार ओटा मतदानकेन्द्रको मतपत्र गणनाका लागि एकै ठाउँ मिसाईएकोमा मतदान गरिएको मत भन्दा ९२ मत बढी भेटिएको थियो ।

साथै खनियाबास गाउँपालिका-४ स्थित गणेशकुण्ड मतदान केन्द्रको दुई ओटा मतपेटिकाको सिल तोडिएको पाइएको भन्दै राप्रपा र एमालेका कार्यकर्ताहरूले विरोध प्रदर्शन गरेका छन् ।

प्रतिनिधि सभा २ नम्बर क्षेत्रको ख प्रदेश सभाको मतगणना बिहान ९:३० बजेदेखि रोकिएको छ ।

गंगाजमुना मण्डली मावि-५ (क), त्रिपुरासुन्दरी गाउँपालिका-२ वडा कार्यालय (क), खनियाबास गाउँपालिका-४ गणेशकुण्ड मावि (ख) र रुबिभ्याली गाउँपालिका-४ मुक्रापदेवी माविको मतगणनाका लागि तयारी गर्दा यस्तो अवस्थामा भेटिएको हो ।

यहाँ १ हजार १ सय ९ मतदाताले मतदान गरेको मुचुल्का आएको थियो । तर मत गणनाको लागि तयारी गर्दा १ हजार २ सय १ मतपत्र भेटिएको हो ।

पछिल्लो मत परिणाम अनुसार नेकपा माओवादी केन्द्रका जगत सिंखडा २ सय ४६ मतले राप्रपाका उम्मेदवार डम्बर तामाङ भन्दा अगाडि छन् । पछिल्लो मत गणनामा जगत सिंखडाको ९ हजार ८ सय ९ मत र डम्बर तामाङको ९ हजार ५ सय ६३ मत रहेको छ ।

सीताराम अधिकारी