मतदान केन्द्र टाढा हुँदा दुई वटा गाँउका मतदातालाई समस्या

  ०७४ वैशाख १३ गते

हिमाली गाउँपालिका-३ गुम्बाका स्थानीयवासीहरूले विगतदेखि नै भोट दिनबाट समस्या भोग्दै आएका छन् । सदरमुकाम मार्तडीबाट ६० कोष टाढा रहेको हिमाली गाउँपालिका-३ गुम्बा गाउँका बासिन्दालाई स्थानीय चुनावमा मतदान गर्न मात्र तीन दिन हिँड्नु पर्ने स्थानीयले गुनासो गरेका छन् ।

साविक विच्छाया गाविसका लाम्पाटा र गुम्बा गाउँमा २६ घरपरिवार बसोबास गर्दै आएका छन् । गुम्बा गाउँमा ३० जना मतदाता रहेको जिल्ला निर्वाचन कार्यलय बाजुराका प्रमुख शुभद्रा गौतमले बताइन् । जसमा आठ जना महिला र २२ जना पुरूष मतदाता रहेका छन् ।

बौडीमा रहेको गङ्गा आधारभूत विद्यालयमा मतदान केन्द्र स्थापना गरिएको छ । उक्त केन्द्रमा आउन गुम्बाबासीहरूलाई तीन दिन पैदल हिँड्नुपर्ने स्थानीयको भनाइ छ ।

मतदान केन्द्रको बारेमा प्रमुख जिल्ला अधिकारीको संयोजकत्वमा निर्वाचन केन्द्र छनौट समिति बनाएको र जिल्लाका सबै राजनीति दलहरूको सहमतिमा केन्द्र तोकिएको निर्वाचन कार्यलय, बाजुराका प्रमुख शुभद्रा गौतमले बताइन् । उनले बाजुराको भुगोलको बारेमा अनविज्ञतासमेत प्रकट गरिन् ।

केन्द्र टाढा भएका कारण यसअघिका कुनै पनि चुनावमा भोट नहालेको गुम्बा गाउँका छिरिङघोर्चे लामाले बताए । उनले भने-'तीन दिन बिताएर के गर्ने ? हाम्रो दुःख कसैले बुझ्ने होइनन् ।'

बिच्छँयाको लाम्पाटा र गुम्बा गाउँमा राज्यले बेवास्ता गरेकाले निर्वाचनमा मतदान गर्ने अधिकारबाट बञ्चित हुनु परेको नेपाल पत्रकार महासङ्घका उपाध्यक्ष निमेन्द्र शाहीले बताए ।

जिल्ला निर्वाचन कार्यालयमा पछिल्लो समय आएको मतदाता नामावली अनुसार ३२ हजार ५ सय २१ जना पुरूष, ३२ हजार ४ सय २७ जना महिला र दुई जना तेस्रो लिङ्गी गरी ६४ हजार ९ सय ५० जना रहेका छन् । जिल्लाभर ६९ मतदान स्थल र ९१ मतदान केन्द्र तोकिएका छन् ।


पदम सिंह