मतदाता शिक्षा सञ्चालन नहुँदा मत बदर हुने चिन्ता

  ०७९ वैशाख २७ गते

स्थानीय तह निर्वाचन आउन दुई दिन बाँकी रहँदा जिल्लाका चारै स्थानीय तहमा मतदाता शिक्षा सञ्चालन नहुँदा मत बदर हुने स्थानीयबासीले चिन्ता गरेका छन् ।

अघिल्ला निर्वाचनमा जिल्लाका सबै स्थानीय तहमा मतदाता शिक्षा कार्यक्रम हुँदा समेत मत बदरको सङ्ख्या देखिएको भएपनि यो पटक मतदाता शिक्षा संचालन नहुँदा धेरै मतदाताहरूको मत बदर हुने चिन्ता बढेको हो ।

निर्वाचनमा भाग लिएका राजनीतिक दलका उम्मेदवार र नेता तथा कार्यकर्ताहरूले भोट माग्न घरदैलोमा आउने गरेको भएपनि कसरी मतदान गर्ने भन्ने विषयमा जानकारी दिने गरेका छैनन । अघिल्ला निर्वाचनमा मतदाता शिक्षाको बारे जानकारी दिन घरघरमै मान्छे आउने गरेका थिए । अहिले निर्वाचन हुन दुई तीन दिन बाँकी हुँदा समेत कोही आएका छैनन यो पटक गठबन्धन र स्वतन्त्र उम्मेदवार बढी भएका कारणले पनि मतपत्र धेरै बदर हुने सम्भावना देखिएको छाँयानाथ रारा नगरपालिका–१ का रुपबहादुर मल्लले बताउनु भयो ।

अघिल्ला निर्वाचनमा निर्वाचन कार्यालयले मतदाता शिक्षा संचालन गरेको मतादाता शिक्षामा खटिएका स्वयमसेवकहरू कुनै न कुनै पार्टीसँग संलग्न हुने भएकाले मतदाता शिक्षा प्रभावकारी देखिएन ।

यो पटकको निर्वाचनमा निर्वाचन आयोगले नै मतदाता शिक्षा समुदायमा नगरी मतदान केन्द्रमा निर्वाचन हुनु दुई दिनअघि संचालन गर्ने निर्देशन दिएकाले समुदायमा मतदाता शिक्षा संचालन नभएको जिल्ला निर्वाचन कार्यालयका सूचना अधिकारी धनकृष्णा बुढाले बताउनु भयो ।

जिल्लाका सबै मतदाताहरु शिक्षित छैनन । यहाँका सबै स्थानीय तहमा अशिक्षित मतदाता धेरै छन् । कतिपय मतदातालाई कसरी मतदान गर्ने भन्ने विषयमा जानकारी छैन । प्राय प्रमुख, उप प्रमुख र वडा अध्यक्षमा बदरको सम्भावना कम देखिएपनि गठबन्धन र सदस्यहरूमा, स्वतन्त्र उम्मेदवारी बढी भएकाले यी पदमा बढी बदर हुने मुगुम कार्मारोङ गाँउपालिका—४ का उर्गिन लामाले बताउनु भयो ।

यो पटक जिल्लाका चारै स्थानीय तहमा ३५ हजार ८९ मतदाता रहेका छन । जसमध्ये छाँयानाथ रारा नगरपालिकामा १२ हजार ४ सय ७७, खत्याड गाँउपालिकामा १० हजार ७ सय १७, सोरु गाँउपालिकामा ७ हजार ८ सय ६४ कार्मारोङ गाँउपालिकामा ४ हजार ३१ मतदाता रहेका छन ।


जीवन सेजुवाल