समाचारहरू

राष्ट्रिय मानव अधिकार आयोगका सदस्य सुदिप पाठकले बदर मत घटाउने उद्देश्यले निर्वाचन आयोगले सञ्चालन गरेको मतदाता शिक्षा कार्यक्रम प्रदेश नम्बर २ मा प्रभावकारी रूपमा नभएको बताए ।

दुई नम्बर प्रदेशको सिरहा, सप्तरी, धनुषा र महोत्तरी जिल्लाको निर्वाचन सुरक्षाको अवस्था स्थलगत अवलोकन गरेर सिरहा आइपुगेका पाठकले भदौ २८ गते पत्रकार सम्मेलन गरी सो जानकारी गराएका हुन् ।

उनले निर्वाचनको प्रचारप्रसारमा बालबालिकाको प्रयोग भएकोप्रति गम्भीर आपत्ति प्रकट गरेका छन् । 'चुनाव हुन गइरहेको २ नं प्रदेशको विभिन्न जिल्लामा अनुगमन गर्दा चुनावी प्रचार प्रसारमा बालबालिकाको प्रयोग भइरहेको पाइएको छ ।'-उनले भने-तत्काल सो कार्यलाई रोक्नु जरुरी छ ।' गाउँगाउँमा मतदाता शिक्षा प्रभावकारी रूपमा सञ्चालन नहुँदा मत बदर हुने सम्भावना बढ्नसक्नेप्रति चिन्ता व्यक्त गर्दै उनले मतदाता शिक्षा सञ्चालन गर्न सुझावसमेत दिए ।

सदस्य पाठकले सप्तरीको १६ स्थानको मतदान केन्द्र खुल्ला स्थानमा रूख मुनि राखिएकोले यस किसिमको मतदानको व्यवस्था मनव अधिकार आयोगलाई मान्य नहुने बताउँदै यसलाई व्यवस्थित तरिकाले ठूलो त्रिपालमुनी भए पनि व्यवस्थापन गर्नुपर्नेमा जोड दिए ।

दुर्गा परियार