मतदाता शिक्षा नपाएको पर्वत कारागारका कैदीबन्दीको गुनासो

  ०७९ मङ्सिर ३ गते

पर्वत जिल्ला कारागारमा रहेका कैदीबन्दीहरुले मङ्सिर ४ गते सम्पन्न हुन गइरहको प्रतिनिधिसभा तथा प्रदेशसभा निर्वाचनका लागि मतदाता शिक्षा नपाएको गुनासो गरेका छन् ।

यस पटक राज्यले कारागारमा रहेका कैदीबन्दीलाई प्रतिनिधिसभा सदस्यको समानुपातिकतर्फ मतदान गर्न पाउने व्यवस्था गरेपनि मतदाता शिक्षा नपाएको पर्वत कारागारका कैदीबन्दी नाइके ज्ञानप्रसाद पाइजाले बताउनु भयो ।

पर्वत कारागारमा १ सय ४ जना कैदीबन्दी रहेका छन् भने ४ गतेको निर्वाचनमा ३५ जनाले मतदान गर्ने भएका छन् ।

अन्य कैदीबन्दीहरुको अन्तिम मतदाता नामावलीमा नाम नभएका कारण मतदान गर्न नपाउने भएको जेलर शिला श्रेष्ठले जानकारी दिनु भयो ।

मतदाता शिक्षा किन सञ्चालन भएन भन्ने इन्सेक प्रतिनिधिको जिज्ञासामा जिल्ला निर्वाचन कार्यालय पर्वतका जिल्ला निर्वाचन अधिकारी लक्षु शर्माले स्थानीय तहको जिम्मेवारी भएका कारण आफुहरु त्यस विषयमा अनविज्ञ रहेको बताउनु भयो ।

उहाँले निर्वाचन आयोगले मतदाता शिक्षा र नमुना मतदान कार्यक्रम सञ्चालनको जिम्मा स्थानीय तहलाई जिम्मा दिएको बताउँदै कुश्मा नगरपालिकाले कैदीबन्दीलाई मतदाता शिक्षा सञ्चालन गर्नुपर्ने बताउनुभयो ।


सन्तोष थापा