समाचारहरू

नेपाली कांग्रेसले मतदाता प्रभावित पार्न वैशाख ७ गते मातातिर्थ औंशीको अवसरमा व्यास नगरपालिका– ३ दमौली स्थित सम्पर्क कार्यालयबाट ७० वर्ष उमेर पार गरेका ज्येष्ठनागरिक महिला भेला गरि दोसल्ला ओढाउने तथा फलफुल वितरण गरेको छ ।

तनहुँ क्षेत्र नम्बर– १ का नेपाली कांग्रेसका उम्मेदवार गोविन्द भट्टराई सहित नेपाली कांग्रेसका महामन्त्री विश्वप्रकाश शर्मा, केन्द्रिय सदस्य शंकर भण्डारी र प्रदेश सभाका सांसद अशोककुमार श्रेष्ठ लगायतले ज्येष्ठ नागरिक महिलालाई दोसल्ला ओढाई सम्मान गर्ने र फलफुल पनि वितरण गर्नुभएको हो ।

नेपाली कांग्रेस व्यास नगर समितिका सभापती सुर्यचन्द्र हड्खलेले मातातिर्थ औंशीको अवसर पारेर जेष्ठ नागरि महिलालाई सम्मान गरिएको बताउनु भयो । उहाँले यो कार्यले निर्वाचन आचार संहिताको उल्लङ्घन नहुने बताउनु भयो ।

जिल्ला निर्वाचन अधिकारी हरिप्रसाद ढकालले मतदाता प्रभावित पार्ने कुनै पनि काम गरिनु आचार संहिताको उल्लङ्घन भएको बताउनु भयो । आफुले यसबारेमा जानकारी पाए लगत्तै उक्त कार्यक्रम तत्काल रोक्न आग्रह गरेको ढकालले बताउनु भयो ।

निर्वाचन आयोगले जारी गरेको निर्वाचन आचार संहिताको १३ नम्बर बुँदाको ‍‌(झ) नम्बरमा कुनै पनि संघ संस्था तथा व्यक्तिलाई नगद वा जिन्सी वितरण गर्न, अनुदान दिन, आर्थिक सहायता तथा चन्दा र पुरस्कार दिन नहुने उल्लेख गरिएको छ ।

प्रकाशचन्द्र भट्टराई