समाचारहरू

स्थानीय तहको दोस्रो चरणको निर्वाचन प्रयोजनका लागि यही जेठ २८, २९ र ३० गते मतदातालाई सम्बन्धित मतदान केन्द्रबाट मतदाता परिचयपत्र वितरण कार्यक्रम रहेको राससले जनाएको छ ।

मतदाता आफैँ आफूले मतदान गर्ने मतदान केन्द्रमा उपस्थित भई परिचयपत्र लिनसक्ने व्यवस्था गरिएको जनाउँदै आयोगले यदि आफैँ उपस्थित हुन नसक्ने अवस्थामा परिवारका सदस्य हो भन्ने यकिन भएपछि परिवारका सदस्यले समेत आफ्नो परिवारका सदस्यको मतदाता परिचयपत्र बुझिलिनसक्ने व्यवस्था गरिएको जनाइएको छ ।

आयोगका प्रवक्ता सूर्यप्रसाद शर्माका अनुसार मतदाता शिक्षालाई थप प्रभावकारी बनाउन ती दिनमा मतदान केन्द्रमा मतदाता शिक्षा कार्यकर्ता परिचालन गरी परिचयपत्र लिन आउनेलाई सही तरिकाले मतदान गर्ने तरिका सिकाउने व्यवस्था मिलाइएको छ ।

यसका लागि नमुना मतपत्रको व्यवस्था गरी मत सङ्केत गर्ने तरिका सिकाउनुका साथै मतदातालाई सक्कली मतपत्रका बारेमा समेत अग्रिम जानकारी होस् भनी मतदान केन्द्रमा सक्कली मतपत्रसमेत अवलोकनका लागि राखिने आयोगले जनाएको छ ।

अनलाइन डेस्क