मतदातालाई कुटपिट गरेको आरोपमा उम्मेदवारलाई गाउँलेले लखेटे

  ०७४ मङ्सिर ६ गते

बाजा बजाएको आरोपमा दलितमाथि कुटपिट गरेको भन्दै छेडागाड नपा-१२ र १३ का मतदाताले नेपाली काङग्रेसका प्रतिनिधि सभा सदस्य उम्मेदवार राजिवविक्रम शाह, प्रदेश सभा सदस्य जाजरकोट २ का उम्मेदवार दिपकजङ्ग शाह तथा उनीहरूको प्रचारप्रसारका लागि खटिएका कार्यकर्ताको टोलीलाई मङ्सिर ५ गते लखटेको स्थानीयबासीले बताएका छन् ।

वाम गठबन्धनको कार्यक्रममा बाजा बजाएको आरोपमा घरभित्रै गएर कुटपिट गर्ने कार्यकर्ता तथा उनका उम्मेदवारलाई स्थानीयले गाउँबाट कुनै कार्यक्रम गर्न नदिएर नाराबाजी गर्दै लखेटेको स्थानीय वीरेन्द्र रोकायले बताए ।

दलितमाथि कुटपिट गर्ने काङ्ग्रेस उम्मेदवार र कार्यकर्तालाई गाउँ प्रवेश गर्न नदिने स्थानीयबासीले बताएका छन् ।

गत कात्तिक ३० गते वाम गठबन्धनको कार्यक्रममा छेडागाड नपा-१२ कले दमाईको टोलीले बाजा बजाएको थियो ।

उक्त कार्यक्रममा बाजा बजाएको भन्दै काङ्ग्रेसका कार्यकर्ताले मङ्सिर १ गते घरमा गएर कले दमाई, पृथी दमाई र मन्दरी दमाईलाई कुटपिट गरेको पीडित पक्षको आरोप छ । आक्रोशित स्थानीयबासीले काङ्ग्रेसको चुनावी स्थलमा विरोधसमेत गरेका थिए ।


दिनेशकुमार श्रेष्ठ