समाचारहरू

पोखरा-लेखनाथ मनपा-११ स्थित मणिपाल शिक्षण अस्पतालका कर्मचारी र प्रहरीबिच चैत १९ गते झडप हुँदा सात जना प्रहरी र पाँच जना अस्पतालका कर्मचारी गरी १२ जना घाइते भएका छन् ।

घाइते हुनेमा जिल्ला प्रहरी कार्यालय, कास्कीमा कार्यरत प्रहरी जवानहरू विपीन थापामगर, गोविन्द राजकोटी, गमबहादुर थापा, रुपलाल थापा, यमुना राजकोटी, अञ्जना घर्तीमगर र तुलसा पोख्रेल रहेका छन् । घाइते सबैको पोखरास्थित फिस्टेल अस्पताल र गण्डकी मेडिकल कलेजमा उपचार भएको जिल्ला प्रहरी कार्यालय, कास्कीका डिएसपी खड्गबहादुर खत्रीले जानकारी दिए ।

घाइते कर्मचारीतर्फराजबहादुर घर्ती, कर्णबहादुर केसी, पार्वती प्रधान, पार्वती गुरुङ र अमर गुरुङ रहेका छन् । उनीहरूको उपचार मणिपाल शिक्षण अस्पतालमा भइरहेको अस्पतालकी नर्स रमा ढकालले बताइन् ।

त्यस्तै सोही घटनामा प्रहरीले १८ जना आन्दोलनकारीलाई गिरफ्तार गरेको छ । गिरफ्तार हुनेमा अस्पतालमा कार्यरत नवराज भण्डारी, अमृत पौडेल, रमेश बोहोरा, नारायण बास्तोला, जीवन थापा, सुजनकुमार ठाकुर, जनार्दन बास्तोला, रामकृष्ण गायक, राजेश ताण्डुकार, इन्द्रबहादुर थापा, अमृतबहादुर गुरुङ, सोभितबहादुर गुरुङ, राजेन्द्र पौडेल, कालीबहादुर बिक, राधा नेपाली, आइतकुमारी परियार, देवी थापा र सुस्मीता गुरुङ रहेको जिल्ला प्रहरी कार्यालय, कास्कीले जनाएको छ ।

अस्पतालमा कार्यरत् अस्थायी कर्मचारीलाई स्थायी गर्नुपर्ने, १ सय ८० दिन सञ्चित बिदा पाउनुपर्ने, युनियन र कर्मचारीबिच विगतमा भएका सम्झौता कार्यान्वयन हुनुपर्नेलगायतका पाँचबुँदे माग राखी विगत १० महिनादेखि कर्मचारीहरू आन्दोलनमा रहेका थिए ।

धर्नामा रहेका कर्मचारीविरूद्ध उपचार गर्न आएका बिरामीका आफन्तले विरोध गरेपछि आन्दोलन चर्किएको र आन्दोलनबाट अस्पतालको झ्यालको सिसा र पर्खालमा समेत क्षति पुगेको जिल्ला प्रहरी कार्यालय कास्कीले जनाएको छ ।

सङ्गीता भाट