समाचारहरू

छविसपाथिभेरा गाउँपालिका–७ स्थित मजखोरी माध्यमिक विद्यालयमा विगत लामो समयदेखि गणित र विज्ञान विषयका शिक्षकको पदपूर्ति नहुँदा पढाइ प्रभावित भएको छ ।

गणित र विज्ञान विषयका शिक्षक नहुँदा विद्यार्थीको पढाइ नै अवरूद्ध भएको मजखोरी माध्यमिक विद्यालयका प्रधानाध्यापक बसन्तबहादुर मण्डलले बताउनु भयो ।

कक्षा ९ र १० मा विज्ञान र गणित विषय पढाउने शिक्षक नपाउँदा विद्यार्थीलाई समस्या भएको प्रधानाध्यापक मण्डलले बताउनु भयो । शिक्षक नियुक्ति गर्न तेस्रो पटक विज्ञापन खोलिए पनि आवेदन नपर्ने गरेको मण्डलको भनाइ छ । ६ महिनादेखि विद्यालयमा शिक्षक अभाव हुँदा गणित र विज्ञान विषय पढ्न नपाएको कक्षा १० मा अध्यनरत छात्र निरज मण्डलले बताउनु भयो ।

सरकारले अध्यापन अनुमति पत्रलाई अनिवार्य गराएपछि विषयगत शिक्षकको अभाव झेल्दै आएका कारण विद्यालयमा तेस्रो पटक विज्ञापन खोल्दा पनि शिक्षक पाउने, नपाउने निश्चित भएको छैन् । विज्ञापन खोल्दा आवेदन नपर्ने भएपछि विद्यालयले अहिले अध्यापन अनुमति–पत्र नभए पनि हुने गरी विज्ञापन माग गरेको छ ।

छविसपाथिभेरा गाउँपालिका ७ का वडाध्यक्ष विजय धामीले शिक्षक अभावका कारण पठनपाठन प्रभावित भएपछि गाउँपालिकासँग समन्वय गरेर विज्ञापन गर्न लगाइएको भए पनि समस्या समाधान हुन नसकेको बताउनु भयो ।

यथासक्य समस्या समाधान हुनेगरी रिक्त शिक्षक दरबन्दी हुनेगरी कार्य सम्पादन गर्न गाउँपालिकाको शिक्षा समितिलाई समेत अनुरोध गरिएको उहाँले बताउनु भयो ।

शिक्षक पदपूर्तिका लागि धेरै पटक विज्ञापन गरिएको भए पनि माग गरिएका अनुसारको आवेदन नपर्दा समस्या समाधान गर्न नसकिएको छविसपाथिभेरा गाउँपालिका शिक्षा शाखाका संयोजक हरिचन्द्र कडायतले बताउनु भयो ।

आवेदन नै नआउने गरेको कारण हाल शिक्षण अनुमति प्रमाण–पत्र नभएकाहरुले पनि आवेदन दिन सक्ने गरी पुनः विज्ञापन गरिएको र शिक्षक पदपूर्तिका लागि लोकसेवा आयोगलाई पनि जानकारी गराइएको उहाँले बताउनु भयो ।

सत्यराज सिंह