समाचारहरू

घोराही उपमनपा–४ सवारीकोटस्थित प्रावि सवारीकोटमा मैथली भाषाको निर्वाचन प्रचार सामग्री पुगेपछि स्थानीय मतदाता अन्यौलमा परेका छन् ।

२ सय ५० घरधुरी रहेको मगर जातिको बस्तीमा मैथली भाषाको निर्वाचन प्रचार सामग्री पुगेको स्थानीय रविलाल घर्तीले बताए । उनले मगर बाहुल्यता रहेको बस्तीमा मैथली भाषाका मतदानकालागि प्रचार सामग्री ल्याउँदा आफूहरू अन्यौलमा परेको गुनासो गरे ।

कुल ७ सय ४८ मतदाता रहेको सवारीकोटमा सबै प्रचार सामग्री मैथली भाषामा पुगेपछि स्थानीयले विरोध गरेका थिए । त्यसपछि प्रचार सामग्री वितरण रोकिएको छ ।

यसैगरी घोराही उपमहानगरपालिका–२ रामपुरमा पनि अवधि भाषाका प्रचार सामग्री पुगेको स्थानीयले बताए । थारू, बाहुन, क्षेत्रीको बाहुल्यता रहेको गङ्गा मावि मतदान केन्द्रमा अवधि भाषाका प्रचार सामग्री पुगेको पाइएको हो ।

त्यस्तै घोराही उपमहानगरपालिका–४ गोग्लीमा पनि अवधि भाषाका निर्वाचन प्रचार सामग्री पुगेको मुनाल घिमिरेले बताए । निर्वाचनको मुखैमा हाते पुस्तिका, पम्प्लेट अवधि र मैथली भाषामा लेखिएका सामग्री पुगेपछि मतदान गर्ने तरिकाका विषयमा समस्या भएको स्थानीयले आरोप लगाएका छन् ।

निर्वाचन कार्यालयले नै फरक भाषाका सामग्री पठाएको भन्दै त्यसलाई वितरण नगर्ने निर्णयमा पुगेको मुख्य निर्वाचन अधिकृत हेमन्त रावलले बताए । उनले थप नेपाली भाषाका सामग्री नै नभएकाले अन्य भाषाका सामग्री पुगेको ठाउँमा पुनः पठाउन नसकिएको बताए ।

जे.एन.सागर