समाचारहरू

सहिदनगर नगरपालिका–८, विसहरपुर का २८ वर्षीय सिबेन्द्र रोहितामाथि ०८० असार २५ गते राति जनकपुरधामको भानु चोकमा कुटपिट भएको छ । रोहिता मकालु खबरका मधेस प्रदेश संयोजक हुन् ।

धनौजी गाउँपालिकामा भएको अनियमितताविरुद्ध असार २३ गते शनिबार ‘धनौजी गाउँपालिकाः हाकिमको रवैयाका कारण स्थानीय उपभोक्ता मार्कामा’ शीर्षकमा ‘पालिकामा अनियमितताको चाङ्ग, बाउन्सर राखेर काम गर्दै हाकिम’ उपशीर्षकको समाचार मकालु खबरकर्मी सिबेन्द्र रोहिताले ‘बाइलाइन’ प्रकाशित गरेका थिए । सोही निहुँमा गाउँपालिकाका प्रमुख प्रशासकीय अधिकृत रन्जित यादवको निर्देशनमा बा १२ च ४२४३ नम्बरको स्कारपियो गाडीमा आएका युवाहरूले आफूमाथि कुटपिट गरेको पीडितको आरोप रहेको छ । स्थानीयले प्रतिकार गरेपछि ती युवाहरू भागेका थिए उहाँले बताउनु भयो ।

कुटपिटमा संलग्न आरोपितहरू महोत्तरी जिल्ला, भङ्गाहा नगरपालिका, हरिनमरिन टोलमा घर भएका अधिकृत यादवका भाइ स्वीटा भन्ने ३० वर्षीय सुनिल अधिकारी, बिल्ला भन्ने २९ वर्षीय सोनु कर्ण, र मिठ्ठु रहेको पत्रकार रोहिताले बताउनु भयो । हतियार सहित आएका आरोपितहरूलाई पक्राउ गर्नुको सट्टा भगाउन प्रहरीले भूमिका खेलेको पीडित पत्रकार रोहिताको आरोप रहेको छ ।

यता धनुषा जिल्ला प्रहरी कार्यालयका एसपी विश्वराज खड्काले घटनाको बारेमा अनुसन्धान भइरहेको जानकारी दिनु भयो । ‘प्रारम्भिक जानकारी अनुसार दुवैतर्फ घाइते भएको कुरा छ,’ उहाँले भन्नु भयो, ‘पत्रकार पक्षसँग कुरा हुन पाएको छैन,’ ‘अधिकृत मुछिएकाको तर्फको भनाई अनुसार साथी साथी बिच विवाद हुँदा हात हालाहाल भएको हो ।’ घटनाको अनुसन्धानका लागि सिसिटिभी फुटेज मगाइएको छ, उहाँले बताउनु भयो ।

पीडित पत्रकार रोहिताको जनकपुरमा उपचार सम्भव नभएपछि काठमाडौं रेफर गरिएको छ । पत्रकार रोहिता काठमाडौं (ललितपुरको एक अस्पताल) मा उपचार भइरहेकोले कुरा हुन नपाएको एसपी खड्काले जानकारी दिनु भयो । ‘घटना जुनसुकै निहुँमा भएको भएपनि दोषीलाई कारबाही हुन्छ, मैले ललितपुर प्रहरीसँग समन्वय गरिरहेको छु । दुवै पक्षको कुरा सुनेर,’ ‘वास्तविक कुरा पत्ता लगाई दोषीमाथि आवश्यक कारबाही त हुन्छ नै, उहाँले भन्नुभयो ।’

अजयकुमार साह