समाचारहरू

सर्वोच्च अदालतका प्रधानन्यायाधीश शुसिला कार्कीले अदालतमा हुने भ्रष्टाचारका विरुद्धमा आफू सक्रिय भएर लाग्ने बताउँदै सबैको सहयोग आवश्यक रहेको बताएकी छन् ।

सर्वोच्च अदालतले भदौ १० गते विराटनगरमा आयोजना गरेको न्यायिक सुशासन र न्यायमा पहूँच विषयक अन्तरक्रियामा प्रधानन्यायाधीश कार्कीले न्याय क्षेत्रमा भ्रष्टाचार हुने कुरा नकार्न नसकिने भन्दै यसलाई निर्मूल पार्न सबैको सहयोगको खाँचो रहेको बताएकी हुन् ।

उनले भ्रष्टाचार भयो भन्ने जानकारी आएपनि कहाँ र कसरी भयो ? भनेर ठोस विषय नआउँदा नियन्त्रण गर्न असजिलो हुने गरेको बताइन् । उनले कानुन व्यवसायीले सहयोग नगरेका कारण अदालतमा हुने भ्रष्ट्राचार रोक्न नसकिएको समेत बताइन् । उनले भनिन्-'एन्टीकरप्सनमा म सक्रिय छु । यसमा कानुन व्यवसायीले सघाउनुहुन्छ भन्ने छ ।'

उनले न्याय क्षेत्रमा लागेका कोही गाडी चढेर हिड्ने तर कसैलाई कात्रो समेत किन्न पैसा नहुने हुनाले पनि भ्रष्टाचार भएको अनुमान गर्न सकिने भन्दै यसमा अनुमगन र मुल्याङ्कन गर्न जरुरी रहेको बताइन् ।

कतिपय मुद्दाहरूमा प्रहरीले जाहेरी नलिँदा परमादेशमा जानुपरेकाले खर्च बढेको, तारेख लिन १० बजे बोलाउने र तारिख एक घण्टामा दिने भनिए पनि १० बजे बोलाएर पाँच बजे तारेख दिने गरिएको कानुन व्यवसायीले गुनासो गरेका छन् ।

इन्दिरा भट्टराई