समाचारहरू

किस्पाङ गापा-१ भाल्चेकी २૪ वर्षिया मन्जुमाया घलेलाई नेपाली काङ्ग्रेसका कार्यकर्ताले रुख चिन्हमा भोट नदिएको आरोप लगाउँदै कुटपिट गरेको नेकपा माओवादी केन्द्रले आरोप लगाएको छ ।

माओवादी केन्द्रका जिल्ला संयोजक हिरानाथ खतिवडाले जेठ ११ गते विज्ञप्ति निकाल्दै जेठ १० गते राति पीडित घलेलाई किस्पाङ गापा-१ बाट पराजित उम्मेदवार शुकबहादुर घलेको निर्देशनमा उनका कार्यकर्ताले हात गोडामा खादा र तारले बाँधी मुख र आँखामा पट्टि बाँधेर मरणासन्न हुनेगरि निर्घात कुटपिट गरेको उल्लेख गरेको छ ।

काङ्ग्रेसलाई भोट नहालेको र माओवादी केन्द्रको पक्षमा प्रचार गरेको आरोपमा नेपाली काङ्ग्रेसका कार्याकर्ताले कुटपिट गरेको सो पार्टीको आरोप छ ।

नेपाली काङ्ग्रेस जिल्ला सचिव सुरेन्द्रराज अधिकारिले घटनामा आफ्नो दलको संलग्नाता नभएको बताएका छन् । जेठ १२ गते इन्सेक प्रतिनिधिसँग कुरा गर्दै उनले भने-"एक हप्तादेखि शुकबहादुर घले काठमाडौँमा हुनुहुन्छ । काठमाडौँमा भएको मान्छेले कुटपिट गरेको भनिएको छ । यो कसरि सम्भव हुन्छ ? घटनामा हाम्रो पार्टीका कार्यकर्ता संलग्न छैनन् ।"

घाइते मञ्जुको उपचार त्रिशूली जिल्ला अस्पतालमा भइरहेको छ । माओवादी केन्द्रका जिल्ला संयोजक हिरानाथ खतिवडाले दोषीलाई कारबाही गर्न माग गरेका छन् । जेठ १२ गते बिहानसम्म पीडित पक्षले प्रहरीमा उजुरी दिएको छैन ।

नवदीप श्रेष्ठ