समाचारहरू

भैरहवास्थित प्रदेश स्तरीय बाल सुधार गृहमा असार ७ गते झडप हुँदा जिल्ला प्रहरी कार्यालय रुपन्देहीका डिएसपी नवरत्न पौडेल र प्रहरी जवान  टोपबहादुर रखाल मगर घाइते भएका छन् ।

बाल गृहमा बस्ने १८ वर्ष उमेरमाथिका किशोरहरूलाई स्थानान्तरण गर्ने तयारीको बिरोधमा रहेका किशोरहरूले ताला लगाएर प्रहरीलाई भित्र छिर्न नदिई आक्रमण गरेका हुन् ।

आक्रमणबाट घाइते भएका डिएसपी पौडेलको टाउँकोमा काठको चिपर्टले हान्दा काठमा गडेको काँटीले काटेको र टाउकोमा तीन वटा टाँका लगाइएको छ भने रखालको हातमा चोट लागेको जिल्ला प्रहरी कार्यालयका एसपी रविन्द्र रेग्मीले बताउनु भयो ।

बालसुधार गृहमा भएको यो पहिलो घटना भने होइन् । पटक पटक विभिन्न घटना घटाइरहेका विवादमा परेका किशोरहरूले बाल सुधार गृहको भवनको सिसा समेत तोडफोड, पंखाहरु तोडेको प्रहरीले जनायो ।

६० जनाको क्षमता भएको बाल सुधार गृहमा हाल १ सय १० जनालाई राखिएको छ ।

प्रहरीले असार ७ गते १८ वर्षमाथि उमेर समूहका कानुनको विवादमा परेका हरूलाई  स्थान्तरणका लागि सम्झाउन गएको बेला प्रहरीमाथि एक्कासी आक्रमण भएको एसपी रेग्मीले बताउनु भयो ।

किशोरहरूले बाल सुधार गृहमा तोडफोड र बेडमा आगजनी गरे पछि दमकल प्रयोग गरेर आगजनी नियन्त्रणमा ल्याएको छ ।

प्रहरीले घटनास्थलबाट किशोरहरूले प्रयोग गरेको १५ थान मोबाइल, १० वटा फलामको  झिर, काठका टुक्रा र चक्कु बरामद गरेको छ ।

प्रहरीमाथि आक्रमण गरेकाे आरोपमा  प्रहरीले १७ जना किशोरहरूलाई प्रहरीले जिल्ला प्रहरी कार्यालयमा ल्याएको  छ ।

रीमा बिसी