समाचारहरू

पर्वत अस्पतालमा तीन वर्षअघि सञ्चालनमा ल्याएकाे भेन्टिलेटर सेवा बन्द हुँदा सेवाग्राही मर्कामा परेका छन् ।

दक्ष जनशक्ति अभावमा भेन्टिलेटर सेवा बन्द भएपछि पर्वत अस्पतालमा आएका जटिल प्रकारका विरामीलाई पोखरा लगायतका स्थानमा पठाउनुपर्ने बाध्यत्मक परिस्थिति सिर्जना भएको छ ।

गण्डकी प्रदेश सरकारले दिएको १ करोड ६९ लाखको लगानीमा आइसीयु र भेन्टिलेटर सेवा केही दिन सञ्चालनमा आएपनि पछिल्लो समय झण्डै दुई वर्ष देखि जनशक्ति अभावमा करोडौँका सामग्रीहरू कोठामा थन्काएर राख्नु परेको अस्पताल प्रमुख रुक्मिणा अधिकारीले बताउनुभयो ।

लायन्स क्लबदेखि अन्तरराष्ट्रिय सहयोगबाट समेत आएका भेन्टिलेटरको सङ्ख्या अहिलेसम्म सात पुगेको छ । अहिले सबै सामग्री स्टोरमा थन्किएको उहाँले बताउनुभयो ।

पर्वत अस्पताल पुरानो संरचनाबाट नयाँ संरचनामा सरेको छ । सुविधा सम्पन्न भवन बनेपछि पुराना भवनका सामग्री र सेवा नयाँ भवनमा सारिएको छ । त्यो क्रममा जडान भएका भेन्टिलेटरहरू पनि निकालेर नयाँ भवनमा सुरक्षित तरिकाले थन्क्याइएको छ । यसरी थन्किनुको कारण सरकारले ‘भेन्टिलेटर’ सञ्चालन गर्ने जनशक्ति आपूर्ति नगर्नु हो ।

भेन्टिलेटर सञ्चालन गर्नका लागि आवश्यक दक्ष जनशक्ति नभएकै कारण आइसीयुमा प्रयोग हुने सबै सामग्री थन्क्याएर राखिएको अस्पतालकी प्रमुख डा. रुक्मिना अधिकारीले बताउनुभयो । एउटा भेन्टिलेटर चलाउन त्यो फाँटको एकजना छुट्टै डक्टर, एकजना एनेस्थेसियालोजिस्ट, एकजना स्टाफ नर्स र एकजना कार्यालय सहयोगीको आवश्यकता पर्ने उहाँको भनाइ छ ।

‘सातवटा भेन्टिलेटर चलाउन २८ देखी ३० जना जनशक्ति आवश्यक हुन्छ । एउटा भेन्टिलेटर चलाउने जनशक्ति नभएका बेला सातवटा त कसरी चलुन् ? अहिले २४ जना नर्सले सिङ्गो अस्पताल चलाउनुपरेको छ’, डा. अधिकारी भन्नुभयो, ‘१५ शय्या क्षमतामा चलेको अस्पतालका रूपमा यसलाई हेरिएको छ । जब कि अहिले हामीले ५६ शय्यामा सञ्चालन गरिरहेका छौँ । उहाँले भन्नुभयो ।

पर्वत अस्पतालमा उपचारका लागि आउनुभएका कुश्मा नगरपालिका– १० पिपलटारीका ६७ वर्षीय सुरविर विकलाई भेन्टिलेटरमा राख्नुपर्ने अवस्था आएपछि अक्सिजन लगाएरै एम्बुलेन्स मार्फत पोखरा पठाइएको अस्पताल प्रमुख डाक्टर अधिकारीले बताउनुभयो ।

जिल्ला भित्रै सेवा सुविधा नपाउँदा बढी रकम खर्चेर पोखरा जानुपर्ने बाध्यता आइपरेको सुरविर विकका छोरा सुजन विकले गुनासो गर्नुभयो । ‘आफुसँग उपचारका लागि पर्याप्त पैसा छैन, ऋण खोजेर ल्याएको पैसाले ठुलो ठाउँमा उपचार गराउन समस्या देखिएको छ’ उहाँले जिल्ला भित्रै सेवा सुविधा भएमा कम खर्चमा उपचार गराउन सकिने बताउनुभयो ।

सरकारले उपकरण दिएपनि सोही अनुसार जनशक्ति व्यवस्थापन गराउन नसक्दा समस्या भएको र गण्डकी प्रदेश सरकार सँग व्यवस्थापनका लागि पहल भइरहेको अस्पताल व्यवस्थापन समितिका अध्यक्ष शंकर गिरीले बताउनुभयो ।

सन्तोष थापा