भूकम्प पीडितले सोधे-'हामी कुन जग्गाको प्रमाण राखेर राहत लिने ?'

  ०७३ कात्तिक २० गते

सुर्यविनायक नपा-१३ चित्तपोलका रामकुमार नगरकोटीको घर भुकम्पले भत्काएपछि रातो कार्ड पाएर अहिले अनुदान सम्झौताको विवरणमा समेत उनको नाम समावेश छ । तर, जग्गा गुठीको नाममा रहेको र सोको लालपुर्जा नभएपछि उनी अनुदान सम्झौता हुन्छ कि हुदैन भन्ने अन्योलमा छन् । प्राधिकरणले भूकम्पले क्षति पुर्‍याएको घरको लालपुर्जा भएकासँग मात्र अनुदान सम्झौता गर्न परिपत्र गरेपछि नगरकोटीजस्ता थुप्रै भूकम्प पीडित अन्योलमा परेका हुन् । यहाँका धेरै पीडितले आफ्नो जग्गा गुठीको नाममा रहेको र लालपुर्जा नभएको गुनासो गरेका छन् ।

सुर्यविनायक नपा-७ का सुर्यबहादुर खाइतुले लालपुर्जा नहुने भूकम्प पीडितलाई अनुदान राहत उपलब्ध हुने आधार तयार गरिदिनुपर्ने बताए । सुर्यविनायक-८ का रबिन्द्र थापाले भूकम्प गएको डेढ वर्षम्म पनि राहत अनुदान प्राप्त नभएको भन्दै असन्तुष्टी व्यक्त गरे । उनले पीडितलाई सहज ढङ्गबाट अनुदान रकम उपलब्ध गराइदिन आग्रह गरे ।

भक्तपुरमा २४ हजार ९ सय २ जना भुकम्प पीडितको विवरण पुनर्निर्माण प्राधिकरणले पठाएको छ । थप केही विवरण आउन बाँकी रहेको बताइएको छ । तर, विवरणमा समावेश भएका भूकम्प पीडितको आफ्नै नाममा लालपुर्जा नहुँदा अनुदान सम्झौतामा समस्या देखिएको हो ।

सुर्यविनायक नपाका कार्यकारी अधिकृत यामलाल अधिकारीले सम्बन्धित मन्त्रालय र उपल्लो निकायबाट निर्देशित केही नीतिगत समस्याहरू बाहेक नगरपालिकाले स्थानीय जनताको पक्षमा कार्य गरिरहेको बताए । उनले जनताको माझबाट उठेका साझा समस्या समाधान गर्ने प्रतिबद्धतासमेत जनाए ।


सविना केसी