समाचारहरू

भूकम्पपछि नुवाकोटमा काम गर्दै आएको अन्तर्राष्ट्रिय गैरसरकारी संस्था अक्सफामले भूकम्प पीडितका लागि ल्याएको राहत सामग्रीहरू गोदाममै सडेको छ ।

सामग्रीहरू समयमै वितरण नहुँदा अक्सफामको विदुर नपा-४ बट्टारमा रहेको गोदाममै सामग्रीको म्याद गुज्रिएको हो । गोदाममा राखिएका मञ्जन र सिमेन्टको म्याद गुज्रिएको अक्सफाम नुवाकोट प्रमुख अरुण पौडेलले बताए ।

'२ सय थान 'हाइजिन किट्स' मा रहेको मञ्जनको म्याद गुज्रिएको हो । यस्तै निर्माणको लागि ल्याएको १ सय १४ बोरा सिमेन्टको पनि म्याद सकिएको हो'-पौडेलले भने-'स्थानीय तहको निर्वाचन र त्यस लगत्तै वर्षातका कारण निर्माणको कामहरू हुन नसक्दा सिमेन्ट ड्यामेज भएको हो ।'

हाइजिन किट्स भने विपदको बेलामा तत्काल वितरण गर्न स्टक राखिएको र बिग्रिएका सामग्रीहरू नष्ट गर्दै नयाँ सामग्री राखेर वितरण गरिरहेको अक्सफामले जनाएको छ । म्याद सकिएको सामग्रीको एकिन विवरण के कति हो ? सो को अभिलेख उतार्न बाँकी रहेको पौडेलले बताए । 'करिब रु. २ लाखको सामग्रीको म्याद सकिएको होला । यो त्यति ठूलो 'इस्यु' होइन'-उनले भने ।

अक्सफामले जिल्लामा साविकका ९ गाविसमा राहत, जिविपोपार्जन र खानेपानी योजनाको पुनर्निर्माणको काम सञ्चालन गर्दै आएको छ ।

नवदीप श्रेष्ठ