भूकम्प पीडितका गुनासो फारम गाविस सचिवका झोलामा

  ०७३ भदौ ११ गते

भूकम्पले घर भत्किए पनि लाभग्राहीको सूचीमा नाम नपरेपछि गुनासो फारम भरेका ओखलढुङ्गाका भूकम्प पीडितका गुनासो फारम गाविस सचिवका झोलामा थन्किएका छन् । गुनासो व्यवस्थापन समितिले चासो नदिएपछि पीडितका गुनासा सचिवका झोलामा थन्किएका हुन् । मौसमी राहत लिए पनि इञ्जिनियरको टोलीले अनुगमन गर्दा मर्मत गरेका, घरै नपुगी विवरण लिइएका कारण ५ हजार ८ सय भूकम्प पीडितहरूको नाम लाभग्राहीको सूचीमा छुटेको थियो ।

गाविस सचिवहरूलाई ०७३ असार र साउन गरी दुई महिनामा गुनासो फारम बुझाएका पीडितहरूको गुनासो फारम नै जिल्ला आइपुगेको छैन । जिविसको कम्प्युटर शाखाका प्रमुख पदम परियारले गाविसबाट सचिवले गुनासो गर्नेको सङ्ख्या मात्र टिपाएको बताए ।

जिल्ला विकास समितिले पुनः निर्माण प्राधिकरणलाई रिर्पोटिङ गर्न सङ्ख्या मागे पनि गुनासो फारम मागेर छानबिन थालेको छैन । स्थानीय विकास अधिकारीले चासो नदिएपछि छानबिन नभएको गुनासो व्यवस्थापन समितिकै सदस्यहरूले बताएका छन् । गुनासो छानबिन नहुँदा पीडितहरू अन्यौलमा परेको प्राप्चाका लेखनाथ फुयालले बताए ।

स्थानीय विकास अधिकारी यज्ञबहादुर खत्रीले अनुदान वितरणको कामले गुनासो छानबिन गर्न नसकेको बताए पनि अनुदान वितरण समेत तथ्याङ्क व्यवस्थापन गर्न नसक्दा एक महिना रोकिएर भदौ लागेपछि शुरू भएको छ । अझै पीडितहरूको खातामा रकम भने पुगी सकेको छैन । ओखलढुङ्गाका अनुदान सम्झौता भएका १७ हजार ३ सय परिवारमध्ये हालसम्म ५ सय ७७ जनाले मात्रै अनुदान पाएका छन् ।


शिवप्रसाद ढुङ्गाना