समाचारहरू

छिमेकी जिल्ला जाजरकोटको बारेकोट गाउँपालिका–१ रामीडाँडा केन्द्रविन्दु भइ कात्तिक १७ गते राति भूकम्प गएको थियो। उक्त भुकम्पमा परी जाजरकोट र रुकुम पश्चिममा जनधन क्षति भएको छ ।

डोल्पा जिल्ला जाजरकोट सँग जोडिएको हुदा साथै बारेकोट र मुड्केचुला जगदुल्ला सिमानाका एउटै भएको हुदाँ उक्त क्षेत्र आसपासमा बसोबास गर्ने नागरिक भूकम्पको त्रासैत्रासमा खुला आकाश मुनि रात काट्दै आइरहेका छन । छिमेकी जिल्ला जाजरकोट र रुकुम पश्चिममा भयानक जनधनको क्षति भएको देख्दा यहाँका स्थानीय नागरिक झन हतोसाहित भएका हुन ।

भूकम्पको डरले बेलुका पख गाउँका सबै मान्छे खुल्ला चौर र विधालयको मैदानमा आगो बालेर रात कटाउने गरेको मुड्केचुला गाउँपालिका–६ का स्थानीय मुस्कान बोहोराले बताए । जाजरकोटको बारेकोट यहाँबाट नजिकै पर्छ भुकम्पको केन्द्र पनि त्यताबाट यतै सर्दैछ भन्छन त्यसैले हामी नर्कुका स्थानीय मात्र नभई वडा नं. १ देखि ९ सम्मका स्थानीय खुल्ला आकाश मुनि रात विताउदै आईरहेका उहाँले भन्नु भयो

पटक पटक आइरहेको भूकम्पको कम्पनका कारण विनाशकारी भूकम्पले जाजरकोट हुदै डोल्पा केन्द्र विन्दु बनाउछकी भन्दै डोल्पाको जगदुल्ला,त्रिपुरासुन्दरी,ठुलीभेरी,शेफोक्सुण्डो,काईके,डोल्पोबुद्ध र छार्काताङसोङका स्थानीय बासिन्दा पनि केहि खुला चौरमा रात विताउन बाध्य छन भने केहि अत्याधिक चिसोको कारण त्रासकाबीच पनि घरमै निदाउन बाध्य छन ।

भिरालो जमिन त्यसैमाथि अधिकांश कच्ची घरहरु भएको हुदाँ पनि यहाँका नागरिक डराउनु स्वभाविकै पनि हो । जिल्लाकाे अधिकांश क्षेत्रमा सुचना प्रविधिको पहुँच नपुगेको हुदाँ भूकम्प आउनु पूर्व जानकारी सन्देश यहाँका नागरिकले थाहा पाउदैनन् । हल्लाकै भरमा ठुलो भूकम्प आउदै छ भन्दै हल्ला गर्छन अनि त्रास फैलाउछन ।

यो समयमा अत्याधिक जाडो हुने भएको हुदाँ भूकम्पको डरले रातको समयमा बाहिर बस्दा बालबालिकालाई थप समस्या हुनेगरेको छ ।

लेख बहादुर बुढा