समाचारहरू

रुकुम पश्चिम जिल्लाको आठबीसकोट नगरपालिका-११, फारुलागाँउमा ०८० कात्तिकमा गएको विनाशकारी भूकम्पले घरवार विहिन भएका नागरिकको पहिरोले टहरा भत्किएपछि परिवारको बिचल्ली भएको छ । मानवीय र भौतिक क्षति बेहोरेका जाजरकोट र रुकुम पश्चिमका नागरिक वर्षामा मनसुनजन्य विपद्बाट त्यतिकै क्षतिको सामना गर्नु परेको छ । भूकम्पले घरविहीन भएपछि स्थायी आवासमा डर त्रासमै रात बिताउने गरेका छन् । अधिकांश नागरिक त्रिपालमुनी बस्न बाध्य भएका छन् ।

आठबीसकोट नगरपालिका-११, फारुलागाँउका नरबहादुर खड्काले भूकम्पको घाउ बिर्सिन नपाउँदै बाढी पहिरोले घर न टहराको बास पाउन मुस्किल भएको बताउनु भयो । 'भूकम्पबाट घर भत्किएर भाग्य बलियो भएर बाँचियो । बर्खाले हरेक दिनरात त्रास दिएको छ । भूकम्पले घर भत्किएपछि बस्नलाई बनाएको अस्थायी टहरा पहिरोले बगायो । सोही गाँउका आठ ओटा घर पहिरोले बगाएको छ । गाउँका ४५ घर पहिरोको उच्च जोखिममा छन्', खड्काले भन्नुभयो । आठबीसकोट नगरपालिका-११ की विर्मी नेपालीले घर भूकम्पले भत्काएको, भएको टहरा पहिरोले बगाउँदा बर्खाको समयमा सर्पको उत्तिकै डर र त्रिपालको भरमा रात बिताउने गरेको बताउनु भयो । गाउँमाथिबाट पहिरो आउनुभन्दा पहिला नै टहराबाट निस्किएकाले ज्यान बचाउन सफल भए पनि टहरा भित्र भएको खाद्यान्न लगाएत सामान बचाउन नसकेको उहाँले बताउनु भयो ।

सरकारले दिएको २५ हजार रुपियाँ अनुदान रकमले टहरा बनाएर बस्दै आएका नागरिक त्रिपालमुनी सर्नु परेको छ । सरकारले दिएको पहिलो किस्ता रकम र केही रकम जोहो गरी बनाएर बसेका टहरा दोस्रो किस्ता नपाउँदै टहरा नै पहिरोले भत्काइदिएको नेपालीको भनाइ छ । साउन १ गतेदेखि आठबीसकोट नगरपालिकाका विभिन्न वडाका बस्तीमा नागरिकले धनजनको क्षति व्यहोर्नु परेको छ । सो गाउँका १६ घरपरिवारलाई वडा कार्यालयले खलबहादुर घर्तिको जग्गामा भाडामा लिएर त्रिपालमुनी सुरक्षित स्थानमा सारिएको आठबीसकोट नगरपालिका-११ का वडा अध्यक्ष प्रेम पुनले जानकारी दिनुभयो । वडा अध्यक्ष पुनले पहिरो प्रभावित परिवारको सुरक्षित बस्न योग्य जमिन नहुँदा सुन्तला, मकै लगाएको जमिन पहिरोले बगाएकाले सुरक्षित स्थानमा सारिएको बताउनु भयो ।

सोही वडाको चिसापानी, गोइरी, डाँडागाउँ लगाएतका बस्ती पहिरोको जोखिममा छन् । एउटा विपद्को घाउ नपुरिदै अर्को विपद् थपिएको छ । चिसापानीका ६४ घर पहिरोको जोखिममा छन् भने ३० घरपरिवारले घर छोडेर सुरक्षित स्थानमा बस्न बाध्य भएका छन् । गोइरीका २० घर पहिरोको जोखिममा छन् । चार घर परिवार त्रिपालमुनी बसेका छन् । भिरालो जमिन भूकम्पले चिराचिरा पारेपछि बर्खाको पानीले बाढीपहिरोको जोखिम बढाएको हो ।

प्रमुख जिल्ला अधिकारी हरिप्रसाद पन्तले मनसुनजन्य घटनाका कारण आठबीसकोट र मुसिकोट नगरपालिकामा पाँच जनाको मृत्यु भएको बताउनु भयो । बाढीपहिरोमा परी एक जना बेपत्ता हुनुभएको छ । साउन १ गतेदेखि साउन २३ गतेसम्म १६ ओटा पशुचौपायको मृत्यु, १८ ओटा घर, १२ ओटा पानी घट्ट र एक ओटा विद्यालय भवन भत्किएका छन् । बाढीपहिरोले रुकुम पश्चिममा २ सय ८३ घरपरिवार विस्थापित भएका छन् । त्यसैगरी २ हजार ७ सय घर जोखिममा रहेको प्रमुख जिल्ला अधिकारी पन्तले जानकारी दिनुभयो ।

बासुदेव शर्मा