समाचारहरू

बारकोटको रामीडाँडा केन्द्र विन्दु बनाएर ०८० कात्तिक १७ गते मध्यरातमा १ सय १ जनाको ज्यान लिने गरी गएको विनाशकारी भूकम्पले घरवार विहिन भएका नागरिकको पहिरोले टहरा भत्किएपछि परिवारको बिचल्ली भएको छ । आवासविहीन भएका परिवार टहरामा सुरक्षित बस्न सक्ने अवस्था छैन । भूकम्पले घर ढलेपछि अस्थायी टहरामा बसेका सर्वसाधारण विपद्जन्य मनसुनले बाढी पहिरो जान थालेपछि डर त्रासमा रात बिताउन बाध्य भएका छन् ।

कात्तिकमा धनजनको क्षति व्यहोरेका जनता मनसुनजन्य घटनाले अस्थायी आवास समेत पहिरोले बगाउन थालेपछि छोड्नु परेको छ । भूकम्प प्रभावित क्षेत्र भेरी नगरपालिका नलगाड नगरपालिका, बारेकोट गाउँपालिका र कुशे गाउँपालिकाका भूकम्प पीडित जनता डर त्रासमै रात बिताउन बाध्य भएका छन् । भूकम्पले दिएको चोट पुरिन नपाउँदै बाढी पहिरोले परिवारको बिचल्ली बनाएको छ । सरकारबाट पहिलो किस्ता पाएर सोही किस्ताले नपुगी साहुबाट कर्जा लिएर बनाएका अस्थायी टहरा दोस्रो किस्ता नपाउँदै बाढी पहिरोले बगाउँदा सर्वसाधारणलाई ज्यान जोगाउन मुस्किल भएको छ ।

नलगाड नगरपालिका–४, सार्कीबाडा सितली सार्कीको घर भूकम्पले भत्किएपछि सरकारको अनुदान सहयोगमा बनाएको टहरा पहिरोले भत्किदा सात जनाको परिवार बिचल्लीमा परेको हो । 'भूकम्पले घर भत्कायो । पहिरोले टहरा पुर्‍यो । विपद् गरिबलाई नै आउने रहेछ । कति पीडा सहेर बाँच्ने हो', सार्कीले भन्नुभयो । भूकम्पबाट बाँचियो । पहिरोबाट बाँचियो । अब के विपद् आइलाग्ने हो । पहिरोले टहरामा भएको अन्नपात पुरिएपछि खाना बस्न समस्या भएको छ । गरिब, विपन्न परिवारको सहारा बन्ने सरकार बेखबर भएको उहाँले बताउनु भयो । सोही वडाका कालीबहादुर रावलको अस्थायी आवास पहिरोले पुरिदिएपछि आठ जनाको परिवार छिमेकीको घरमा बस्नु परेको छ । पहिरोका कारण उच्च जोखिममा रहेका सात घरपरिवारले घर छोडेर छिमेकीको घरमा शरण लिएका छन् ।

पहिरोले टहरा पुरेपछि बिचल्लीमा परेका कालीबहादुर रावल सहित छिमेकीको घरमा बसेका परिवार नगरपालिकाको प्रशासनिक केन्द्रमा व्यवस्थापनका लागि निवेदन लिएर पुगे पनि स्थानीय सरकारले बेवास्था गरेको पीडित परिवारले बताएका छन् । पहिरो आएपछि परिवार भागेर बच्न सफल भएको र टहरामा भएको अन्नपात पुरिदा खानाको समस्या भएको रावलले बताउनु भयो । स्थानीय सरकारसँग सहयोग माग्न निवेदन लिएर पुगे पनि वास्ता नगरेपछि रित्तो हात फर्किको रावलले बताउनु भयो ।

गरिब, विपन्न, आर्थिक अवस्था कमजोरीले बास बनाउन नसक्ने जनतालाई सरकारले दिएको अनुदान सहयोगबाट बनाएका टहरा नै पहिरोले बगाएपछि ज्यान जोगाउन गाह्रो भएको छ । भिरालो, भूकम्पले धुजा फाँटेको जमिन पानीले भिजाएपछि पहिरोको डरले रातभर जाग्राम बस्नु पर्ने बाध्याता छ । भूकम्पले घरबास गुमाएपछि चिसो मौसम त्रिपालमुनी ओत लागेका जनता भूकम्पले बचेको शरीर जोगाउन निर्माण गरी बसोबास गरेकाे टहराे पहिरोले पुरेपछि त्रिपाल टाँगेर बस्नु परेको छ ।

नलगाड नगरपालिका–४ का वडा अध्यक्ष बुद्धीबहादुर पन्तका अनुसार भूकम्पले घर ढलेपछि अस्थायी टहरामा बसेका सितली सार्कीका सात जना, कालीबहादुर रावलका आठ जना परिवारलाई छिमेकीको घरमा सुरक्षित सारिएको छ भने पहिरोको जोखिमामा रहेका सात जनाको परिवारलाई छिमेकीको घरमा सारिएको छ । स्थानीय सरकार र सङ्घसंस्थाको सहयोगमा सुरक्षित स्थानमा व्यवस्थापन गर्ने उहाँले बताउनु भयो । पहिरोको जोखिममा रहेका परिवारलाई सुरक्षित स्थानमा बस्न आग्रह गरिएको छ ।

बासुदेव शर्मा