भूकम्पपछि टेण्ट र टहराबाट स्वास्थ्य सेवा

  ०७३ भदौ १८ गते

गत वर्षको वैशाख १२ गते गएको भूकम्पले भत्काएका स्वास्थ्यचौकी पुनर्निर्माण नगरिँदा अधिकांश गाविसका स्वास्थ्य संस्थाले टेण्ट र टहरोबाटै स्वास्थ्य सेवा दिइरहेका छन् ।

भूकम्पले गोरखाको ५४ ओटा स्वास्थ्य संस्थामा पूर्ण रूपमा क्षति पुर्‍याएको थियो । ती मध्ये श्रीनाथकोट गाविसमा मात्र अर्धपक्कि भवन वनेको छ । फुजेल, दर्बुङ, ताकुकोट, लापु, धावा, आरुपोखरी, गुम्दा, घ्याल्चोक, सौरपानी, माछाखोला र थुमि गाविसका स्वास्थ्यचौकीले टेण्टबाटै सेवा दिइरहेका छन् । भूकम्पले भत्किएका अन्य स्वास्थ्य संस्थाले भने टहरोबाट सेवा दिइरहेका छन् ।

भूकम्प गएको १५ महिना बित्न लाग्दासमेत स्वास्थ्यचौकी भवन निर्माण नहुँदा टेण्ट र टहरोबाट मुस्किलले सेवा दिइरहेको स्वास्थ्यकर्मीहरू बताउँछन् । 'गर्मी हृवात्तै बढेको छ, टेण्ट तातेर भित्र बस्न सक्दैनौँ । तर, पनि सेवा भने दिइरहेका छौं ।'-दर्वुङ स्वास्थ्यचौकीका अहेव पप्पुकुमार रौनियारले भने-'घामले तातेर बिरामी जाँच्दाजाँच्दै आफै बिरामी हुने अवस्था छ ।'

पानी परेको समयमा स्वास्थ्य सेवा दिन निकै समस्या हुने पनि उनले बताए । 'पानी परेको बेला टेण्ट र टहराको आवाजले बिरामीको आवाजै सुनिँदैन । पानी परुञ्जेल काम बन्दै हुन्छ ।'-उनले भने । टेण्टमुनि औषधि राख्ने ठाउँको पनि अभाव भएको स्वास्थ्यचौकीकी इन्चार्ज विनिता श्रेष्ठले बताइन् । 'स्टोर पनि टेण्ट भित्रै छ । औषधि तातेर पग्लिएला जस्तो हुन्छ ।'-श्रष्ठले भनिन् ।

टेण्ट तातेर जाँच्न आउने बिरामी पनि धेरै समय डक्टरसँग बस्न नचाहने स्वास्थ्यकर्मीहरू बताउँछन् । स्वास्थ्य जाँच गराउन स्वास्थ्यचौकी आएका दर्वुङ-७ का खिमबहादुर विकले भने-'भित्र बस्न सकिँदैन, बाहिरै घाममा तातिएर बस्यो । आफ्नो पालो आएपछि मात्र भित्र पस्ने हो ।'

भूकम्पले भत्काएको स्वास्थ्य संस्था पुनर्निर्माणका लागि विभिन्न सङ्घसंस्थाले जिम्मा लिइसकेको जनस्वास्थ्य कार्यालका हेल्थ असिस्टेण्ट नानीबावु दानीले बताए । 'बर्खा सकियो अब भूकम्पले भत्काएको स्वास्थ्यचौकी पुनर्निर्माण तीव्र गतिमा हुन्छ ।'-दानीले भने ।

Photo20160903Gorkha Photo20160903Gorkha1 Photo20160903Gorkha3


हरिराम उप्रेती