समाचारहरू

भूकम्पपछि जाजरकोट जिल्लाका अधिकांश नागरिकहरू आवासविहिन हुँदा थप समस्यामा परेका छन् । सुरक्षित आवास नहुँदा भूकम्प प्रभावित क्षेत्रका नागरिकहरू पीडै पीडामा दिनरात बिताउन बाध्य भएका हुन् ।

भिरालो जमिन भूकम्पले धाँजा फाटेका पहाडमुनीका बस्तीका नागरिकलाई दिनरात बिताउन मुस्किल भएको छ । बारेकोट गाउँपालिका–१, रामिडाँडा केन्द्र विन्दु भएर गत वर्ष कात्तिक १७ गते गएको विनाशकारी भूकम्पले भेरी नगरपालिका, नलगाड नगरपालिका, कुशे गाउँपालिका, छेडागाड नगरपालिकामा भूकम्पले सर्वसाधारणको धनजन क्षति भएको हो । जाजरकोटका सात ओटा स्थानीय तह भूकम्पको धक्काबाट अछुतो रहेनन् । भूकम्पका कारण घरवारविहिन जनता खानाको अभावमा थप समस्या र वर्षाको बाढीपहिरोले ज्यान बचाउन समेत गाह्रो भएको छ ।

सरकारले अस्थायी आवासका लागि दिएको पहिलो किस्ता र साहुबाट कर्जा लिइ बनाएका टहारामा बस्दै आएपनि अविरल वर्षाका कारण नागरिकहरू त्रासमा बस्ने गरेका छन् । भूकम्पपछि खेतीयोग्य जमिनमा अस्थायी आवास बनाएर बसेपछि खानामा समेत समस्या भएको छ ।

जिल्ला प्रहरी कार्यालयका डिएसपी पुरुषोत्तमप्रसाद पाण्डेका अनुसार मनसुनजन्य विपद् बढ्दै गएकाले सुरक्षित स्थानमा बस्न गाउँ तथा नगरपालिकामा रहेका प्रहरी युनिटले सूचना गर्दै आएका छन् । उहाँले सोही अनुसार भिरालो जमिनमा घर तथा टहरा बनाइ बसेका नागरिकलाई घरमाथिको अवस्थालाई मध्यनजर गरी सुरक्षित बस्न आग्रह गर्नुभयो । विपद् जन्य घटनामा ०८१ जेठ महिनादेखि भदौ २२ गतेसम्म बाढीबाट कुशे गाउँपालिकामा एक जना, नलगाड नगरपालिकामा एक जना, बारेकोट गाउँपालिकामा एक जना गरी तीन जना बेपत्ता भएका छन् ।

नलगाड नगरपालिका–१, चिउरीगाँउका लालबहादुर कामीले ज्यालामजुदरीबाट भूकम्पपछि चिसो, गर्मी छिचोल्दै विहान बेलुकाको गर्जे टारेका नागरिकलाई बर्खाको बाढीपहिरोले सताउन थालेपछि त्रासै त्रासमा दिन बिताउने गरेको बताउनु भयो । नलगाड नगरपालिका–४ का ध्रुव गौतमले भिरोलो जमिनमा बनाएका घरमा माथिबाट पहिरो आएर घरसँगै नागरिकको धनजन क्षति पुर्‍याउन थाल्दा गाउँका नागरिक निराशा भएको बताउनु भयो ।

जिल्ला प्रशासन कार्यालयका प्रमुख जिल्ला अधिकारी उमाकान्त अधिकारीले वर्षा नरोकिएकाले बाढीपहिरोको बेला उच्च सतर्कता अपनाउन आग्रह गर्नुभयो । उहाँले भिरालो जमिनमा बसोवास गरेका अधिकांश नागरिक स्वयम् सचेत हुन अनुरोध गर्नुभयो ।

बासुदेव शर्मा