समाचारहरू

हिमाली गाउँपालिकाको बिच्छ्यामा केन्द्रबिन्दु बनाएर माघ १० गते गएको भूकम्पका कार गौमुल गाउँपालिका–२ की जमुना रोकायाको मृत्यु भएको छ भने चौपाय र भौतिक संरचनामा पनि क्षति पुगेको छ ।

जुरेली भन्ने जङ्गलमा घास काटीरहेको बेला भूकम्पका कारण माथीबाट आएको ढुङ्गा लागेर रोकायको घटनास्थल मै मृत्यु भएको वडाध्यक्ष देबहादुर रोकायाले बताउनु भयो ।

यसैगरी भूकम्पका कारण भिर फुट्दा भेडा चराउन गएका गौमुल गाउँपालिका–१ का स्थानीय रामदल बोहोरा घाइते हुनु भएको छ । ढुङ्गा लागेर बोहोराको टाँउको, हात र खुट्टामा चोट लागेको छ । घाइते बोहराको उपचार अम्लिस स्वास्थ्य चौकीमा भइरहेको स्थानीय सुभाष रोकायाले बताउनु भयो । भूकम्पकै कारण पहिरो जाँदा पहिरोमा परेर स्थानीय रामदल होरोराका ५० बढी भेटा मरेको समेत रोकायले बताउनु भयो ।

भूकम्पका कारण बडिमालिका नगरपालिका–७ रजातोलीका हरिचन्द पाध्याय, सोही वडाको सिराडीका धनबहादुर बिक र करबिरे लोहार, बडिमालिका नगरपालिका–८ का हर्क गुरुङको घर पूर्ण रुपमा भत्केका छन् । बडिमालिका वडा नम्बर ८ का तुला थापा, जया रावल, रुपा रावल, बडिमालिका नगरपालिका वडा नम्बर ९ का किट्टो लुहार, गोले थापा, बसन्त बिक, गचे चदारा, शान्ति धोजाली, सुर्जा विक, लाल चदारा, प्रकाश चदारा र गोरख चदाकाका घर पूर्ण रुपमा चर्कीएको वडाध्यक्ष सूर्यकिरण विकले बताउनु भयो ।

बडिमालिका नगरपालिका–२ का वडाध्यक्ष डम्मर महतका अनुसार वडाका दिल हमाल, नरेन्द्र हमाल र भौनेरा माध्यामिक विद्यालयको भवनमा क्षति भएको छ ।

हिमाली गाउँपालिका–६ स्थित भवानी मावि विद्यालयको तीन कोठे भवन पूर्ण रुपमा भत्केको छ भने अर्को भवन चर्किएको गाउँपालिकाका उपाध्यक्ष राजकला सार्कीले बताउनु भयो ।

यसैगरी हिमाली गाउँपालिका–६ का धनराज संज्याल, नन्दकृष्ण पाण्डे, उमाकान्त पाण्ड,े नन्द बुढा, नन्दकृष्ण पाण्डेको घरमा क्षति भएको उपाध्यक्ष सार्कीले बताउनु भयो ।

उहाँले हुम्ला जिल्लाको ताजाकोट घर भई दिदि रुपा नेपालीको घरमा आएकी १६ वर्षीया सरिता नेपाली भूकम्प आएको समयमा भाग्न खोज्दा बोहोस भएर घाइते भएकिन र उनको उपचार धिम स्वास्थ्य चौकीमा भइरहेको बताउनु भयो ।

यसैगरी हिमालि गाउँपालिका वडा नम्बर ५ का कर्णबहादुर बुढ्थापा, धनबहादुर कार्की, प्रदिप थापा, सम्भुलाल कार्की, वडा नम्बर ४ का धिरेन्द्र मल्ल र ज्ञानेन्द्र मल्लको घरमा क्षति पुगेको छ ।

मुख्य केन्द्र बिन्दु रहेको हिमाली गाउँपालिकाको बिच्छायामा माघ ११ गते बिहानदेखि हिमपात हुँदा टेलिफोन टावर नहुँदा सम्पर्क गर्न गाह्रो भएको जिल्ला प्रहरी कार्यालयका डिएपी सूर्यबहादुर थापाले बताउनु भयो ।

उहाँले भन्नु भयो– ‘बिच्छाया प्रहरी चौकी छ । तर, प्रहरीले चलाउने सेट छैन । फोनको आधारमा सूचना लिने गरेकोमा विहानदेखि हिउ र पानीका कारण टावर नहँदा सम्पर्क भएको छैन् । यदपी प्रहरीले सूचना संकलन गर्ने र प्रहरी चौकीले उद्धारमा पनि काम गरिरहेको छ ।’

भूकम्पबाट बिस्तापित परिवारलाई स्थानीय र आफन्तको सहयोगमा छिमेकीको घरमा बसाल्ने वातावरण मिलाइएको बडिमालिका नगरपालिका वडा नम्बर ७ का वडाध्यक्ष धर्मराज पाध्यायले बताउनु भयो ।

प्रमुख जिल्ला अधिकारी पुष्कर खड्काले भौगोलिक कठीनाईका कारण समस्या भएको, पीडित र क्षतिको विवरण संकलन कार्य भइरहेको बताउँदै तत्काल राहातको लागि स्थानीय पालिकालाई अनुरोध गरेको बताउनु भयो ।

पीडितहरुको विवरण संकलन भएलगत्तै राज्यले तोकेबमोजिमको राहत तत्कालनै दिने वितरण कार्य गरिने पनि प्रमुख जिल्ला अधिकारी खड्काले बताउनु भयो ।

मंगलबार दिउँसो २ बजेर ४३ मिनेटमा बाजुराको हिमाली गाउँपालिकाको बिच्छया आसपास केन्द्रबिन्दु बनाएर ५.९ म्याग्नेच्युडको भूकम्प गएको भूकम्प मापन केन्द्रले जनाएको छ ।

पदमबहादुर सिंह