समाचारहरू

भारतीय अधिकारकर्मी इरोम शर्मिलाद्वारा १६ वर्षलामो अनसन साउन २५ गते तोडेकी छन् । विशेष शक्तिसहित सेना परिचालन गर्ने ऐनविरुद्ध अनसनमा उत्रेकी शर्मिलाले आज अनसन तोडेको खबर अन्तर्राष्ट्रिय सञ्चार माध्यामहरूले जनाएका छन् ।

द्वन्द्वमा पिल्सिएको भारतको उत्तर-पूर्वी राज्य मणिपुर निवासी ४४ वर्षीया शर्मिलाले आजै अदालतसामु उपस्थित भएर अनसन तोड्ने घोषणा गरेसँगै प्रहरी हिरासतबाट मुक्तसमेत भएकी छन् । अदालतले उनलाई १० हजार रुपियाँ धरौटीमा रिहा गरेको हो ।

उनले गत जुलाइ २६ मा अनसन तोड्ने घोषणा गरिसकेकी थिइन् । मणिपुरको प्रान्तीय निर्वाचनमा स्वतन्त्र उम्मेदवारका रूपमा चुनाव लडेर राजनीतिमा सक्रिय भई फरक माध्यामबाट आफूले उठाएका मुद्दालाई सम्बोधन गर्ने उनले घोषणा गरेकी छन् ।

आसम राइफल्सका सैनिकले १० जना सर्वसाधारण नागरिक मारेको दुई दिनपछि उनले अनसन थालेकी थिइन् । सन् २००० को नोभेम्बर २ बाट सुरु भएको उनको अनसन आज अन्त्य भएको हो ।

अनलाइन डेस्क