समाचारहरू

खप्तड छेडेदह गाउँपालिका–२ माँटेसागुमा भाइरल ज्वरोका कारण गाउँनै प्रभावित बनेको छ । भाइरल ज्वरोका कारण २ जनाको मृत्यु भएको स्थानीय दिर्घबहादुर शाहीले बताउनु भयो । भाइरल ज्वरोका कारण माँटेसागुका ४९ वर्षीया सौरादेबी बुढा र ६२ वर्षीय कुलबहादुर शाहीको मृत्यु भएको हो । बुढाको चार दिन पहिला र शाहीको असोज ७ गते राति मृत्यु भएको स्थानीय दिर्धबहादुर शाहीले बताउनु भयो ।

गाउँमा रहेका १ सय ६० बढी परिवारको सबै घरमा बिरामी परेका छन् । दुई जनाको मृत्यु भइसकेको छ । भाइरल ज्वरोले पुरै गाउँनै प्रभावित रहेको स्थानीय गणेशबहादुर शाहीले बताउनु भयो । कुनै घरका सबै सदस्य बिरामी परेका छन् । एक / दुई जना त सबै घरमा बिरामी परेको, भाइरल ज्वरो फैलिएको एक हप्ता भइसकेको भए पनि उपचारका लागि पहल गर्दा कतैबाट स्वास्थ्यकर्मी नआएको स्थानीय शाहीको आरोप छ ।

१ सय ३ डिग्रिमाथि ज्वरो आउने गरेको, खोकी लाग्ने, स्वास फुल्ने जस्ता लक्षण देखापरेको स्थानीयले बताउनु भएको छ । गाउँमा भाइरल ज्वरो फैलिएको खबर पाएपछि स्वास्थ्यकर्मीको टोली पठाउने तयारी भइरहेको स्वास्थ्य कार्यालय, बाजुराका निमित्त प्रमुख महेश चन्दले बताउनु भयो । खप्तड छेडेदह गाउँपालिकाबाट दुई जना स्वास्थ्यकर्मी पठाइसकेको र जिल्ला स्वास्थ्य कार्यालयबाट औषधि सहितको टोली पठाउन लागेको उहाँले बताउनु भयो ।

भाइल ज्वरोबाट ज्येष्ठ नागरिक, बालबालिका र दीर्घरोगी सबै भन्दा बढी प्रभावित भएका छन् । स्वास्थ्यचौकी एक घण्टा टाढा रहेकाले उपचारमा जान निकै समस्या भएको छ । घरका सबै बिरामी परेका छन् ।  बोकेर लिने कोही छैनन् । वर्षातका कारण् सडक बन्द भएपछि घरमै बिरामी परेर थला परेको स्थानीय गणेश शाहीले बताउनु भयो । वडा तथा गाउँपालिकामा पटकपटक जानकारी गर्दा पनि अहिलेसम्म स्वास्थ्यकर्मी नपुगेको उहाँले बताउनु भयो । कसैको घरमा पानी समेत दिने स्वास्थ्य मान्छे नभएको शाहीको भनाइ छ ।

खप्तड छेडेदह गाउँपालिकाका अध्यक्ष दिलबहादुर रावतले स्वास्थ्यकर्मीको टोली प्रभावित क्षेत्रमा पठाइसकेको बताउनु भयो । ल्याब सहितको स्वास्थ्यकर्मीहरुको टोली पठाइएको र रोगको पहिचान गरेर नियन्त्रणमा नआएको प्रदेश र सङ्घीय सरकारसँग सहयोगका लागि समन्वय गरिने अध्यक्ष रावतको भनाइ छ ।

पदमबहादुर सिंह