समाचारहरू

नलगाड नगरपालिका – ४ बाउसेखोला टाेलमा एक साता देखि भाइरल ज्वरो फैलिएको छ । स्थानीय ६४ वर्षीय जय बहादुर खड्काले भन्नु भयो ‘एक साता देखि  ज्वरोले बिरामी भएको छु । ज्वरो आउने, बान्ता हुने, रुघा खोकी ,टाउको दुख्ने र रिगाटा लाग्ने  गरेको छ । ’

यसै गरी सोही ठाँउका महेन्द्र रावलका अनुसार घरका परिवारमा सबै जनामा भाइरल ज्वरोले बिरामी परेको र अहिले  स्थानीय स्वास्थ्य चाैकीमा उपचार भइरहेकाे बताउनुभयो ।

स्थानीय स्वास्थ्य संस्थामा उपचार गर्न जाँदा औषधिको अभावले खाली हात फर्किन परेको छ । बिरामीहरुले पाँच हजार सम्मको महङ्गो मूल्यमा नलगाड नपा–३ कैनामा गएर निजी मेडिकलमा उपचार गराउन बाध्य भएको स्थानीय दलबहादुर खत्रीले बताउनुभयो ।

अधिकांश बस्तीमा ज्वरोका बिरामी बढेका छन् । ज्वरो, मौसमी रुघाखोकी लगायतका कारण बाउसेखोला, दारफाका, भातचिउरा, खालचौर, ओवा, भेरीखर्क, औलसिमा, पाटा, कोठीगाउँ लगायत स्थानमा घरघरै बिरामी परेका छन् । गाउँमा बालकदेखि ज्येष्ठ नागरिकसम्मलाई ज्वरोले सताएको स्थानीय स्वास्थ्य चौकी लहँका प्रमुख भुपेन्द्रराज गिरीले जानकारी दिनुभयो।

स्वास्थ्य चौकीमा दैनिक १ सय जना बिरामी उपचारका लागि आउने गरेका छन ।  जनशक्ति र स्रोत साधन नभएको कारण बिरामीको चाप धेरै भए पछि मेट्रो ,सिटामोल एनटिभाईटिक ईन्जेक्सन ,डिकोल्ड ,जिवनजल लगायतका औषधिको अभावका कारण बिरामीको उपचार गर्न समस्या भइरहेको लहँका प्रमुख गिरीले बताउनुभयो।

अशक्त र धेरै बिरामी भएका ५० भन्दा बढी बिरामीहरुको घरघरमै गएर उपचार गरिरहेको र जिल्ला स्वास्थ्य कार्यालय बाट स्वास्थ्यकर्मी , औषधि र अन्य उपकरण सहयोगको लागि माग गरेको उहाँको भनाइ छ ।

भाइफल ज्वरो फैलिएपछि केही दिन औषधि भएपनि अहिले समस्याको समाधान भइसकेको  नलगाड नगरपालिकाका स्वास्थ्य शाखा प्रमुख प्रचण्ड कार्कीले जानकारी दिनुभयो।

मनाेज केसी