भवानी अस्पतालमा आक्रमण, दुई जना स्वास्थ्यकर्मी घाइते

  ०७८ साउन १८ गते

वीरगंज महानगरपालिका–८ लिङ्क रोडमा अवस्थित भवानी अस्पतालले जिउँदो मान्छेलाई मृत घोषित गरेको भन्दै एक समूहको आक्रमण परी वीरगंज महानगरपालिका–१५ निवासी ३२ वर्षीया नर्स कविता चौधरी र वीरगंज महानगरपालिका–१३ निवासी २७ वर्षीय चिकित्सक विजय महतो घाइते हुनु भएको छ । उहाँहरूको उपचार अस्पतालमै भएको छ ।

मृतकका आफन्त र गाउँलेहरूले अस्पतालमा कार्यरत चिकित्सक र नर्समाथि आक्रमण गरेको अस्पतालका प्रवन्ध निर्देशक रामराज श्रेष्ठले बताउनु भयो ।

अस्पतालका निर्देशक श्रेष्ठका अनुसार पहिल्यैदेखि मुुटु रोगबाट ग्रसित ३२ वर्षीया रमिता देवीलाई उपचारका लागि साउन १७ गते बिहान अस्पताल ल्याइएको थियो । उहाँका अनुसार चिकित्सकले चेकजाँच गर्दा उनको मृत्यु भइसकेको थियो ।

अस्पतालले मृत घोषणा गरेपछि आफन्तले अन्तिम संस्कारका लागि लिएर गएका थिए । तर, दिउँसो १ बजे रमितालाई पुनः अस्पतालमा फिर्ता ल्याई आफन्त र गाउँलेले जिउँदो मानिसलाई मृत घोषणा गरेको भन्दै तोडफोड गरेको आरोप छ ।

मृत महिलालाई अन्तिम संस्कारका लागि वीरगंज महानगरपालिका–२० मा रहेको मनियारी लगिएको थियो ।

संस्कार पूर्व स्नान गराउने प्रचल छ । त्यही बेलामा मुख चलेको जस्तो लागेपछि आफन्तले महिलालाई पुनः अस्पताल पुर्‍याएको थिए ।

अस्पतालले फेरि पनि सबै परीक्षण गरेर मृत घोषणा गरेको थियो । मृतकका परिवारले कुरा बुझेका थिए तर मलामी जान तयार भएका व्यक्तिहरूको भिडले कुरा नबुझी अस्पतालमा तोडफोड गरेको अस्पतालका प्रबन्ध निर्देशक श्रेष्ठले जानकारी दिनु भयो ।

प्रहरी समयमै आएर स्थितिलाई नियन्त्रणमा लिएकोले थप क्षति हुन नपाएको निर्देशक श्रेष्ठको भनाइ छ ।

अस्पतालमा तोडफोड भएको सूचना पाएपछि पुगेको प्रहरी र प्रदर्शनकारीबिच केहिबेर झडप भएको थियो । प्रहरीले लाठीचार्ज गरेर भीडलाई तितरबितर पारेको थियो ।

अस्पतालमा आक्रमण गरेको घटनाको आरोपमा प्रहरीले वीरगंज महानगरपालिका–२० का ३२ वर्षीय राकेश राम, ४४ वर्षीय सुरेश राम, २२ वर्षीय अक्षय राम र बारा जिल्ला परवानीपुर गाउँपालिका–१ का २८ वर्षीय भीम रामलाई साउन १७ गते गिरफ्तार गरेको छ ।

आरोपित चारै जनासँग आवश्यक सोधपुछ गरिरहेको जिल्ला प्रहरी कार्यालय पर्साका डिएसपी ओमप्रकाश खनालले जानकारी दिनु भयो ।


कृष्णचन्द्र लामिछाने