समाचारहरू

पुरुष बन्दी गृह समयमा बनाउन नसकेका कारण पाल्पा कारागारका कैदीबन्दीहरू भत्कँदै लागेको भवनमा जोखिम मोलेर बस्न बाध्य भएका छन् ।

०६८ असार १६ गते सम्झौता भई ०७० वैशाख १६ गतेसम्म कार्यसम्पन्न गर्नुपर्ने सहमति भएको बन्दी गृह निर्माणको काम तीन पटक म्याद थपिँदासम्म अहिलेसम्म ७० प्रतिशत पनि सम्पन्न हुन सकेको छैन । उक्त भवन निर्माणको ठेक्का विरुवा सुन्दरी गोरखा जेभीले लिएको छ । भवन डिभिजन कार्यालयका इञ्जिनियर हरिभक्त श्रेष्ठले निर्माण व्यवसायीको ढिलाइको कारण समयमा काम सम्पन्न हुन नसकेको जानकारी दिए ।

बिसं. १९८३ मा निर्माण गरिएका कारागारका पुराना भवनहरू अधिकांश जीर्ण र भत्कने अवस्थामा छन् । ०७२ साल वैशाखको भूकम्पका कारण भत्किएका दुई ओटा भवनको सामान्य मर्मत गरी बन्दीहरूलाई सोही भवनमा राखिएको छ । अन्य भवनहरू समेत निकै जीर्ण भएकोले दलिनमा टेको लगाएर राखिएको छ ।

'ग' श्रेणीको पाल्पा कारागारको क्षमता ३ सय जना रहेको छ । अहिले कैद तोकिएका कैदी पुरुष २ सय ८ जना र महिला ५३ जना रहेका छन् । त्यस्तै कैद नतोकिएका बन्दी पुरुष १२ जना र महिला ११ जना रहेका छन् । कारागारमा दुई जना बालक र एक जना बालिका आश्रति रहेका छन् ।

महिला बन्दी गृहको नयाँ भवन बनेपछि महिलातर्फ कुनै समस्या नरहेको र पुरुषतर्फ क्षमता भन्दा बढी बन्दी जीर्ण भवनमा राख्नुपर्दा समस्या भएको कारागारकी जेलर सुजाता कार्कीले बताइन् ।

यज्ञमूर्ति तिमिल्सिना