भवन अभाव हुँदा पठन पाठनमा समस्या हुने गरेको आपाङ्गता भएका विद्यार्थीहरुको गुनासो

  ०७९ साउन ३१ गते

आवासीय भवन तथा विद्यालयमा कक्षा कोठाको अभाव हुँदा पठनपाठनमा समस्या हुँदै आएको सिद्धनाथ माध्यमिक विद्यालयमा अध्ययनरत आपाङ्गता भएका (आँखा नदेख्ने र कान नसुन्ने) विद्यार्थीले गुनासो गर्नु भएको छ ।

जिल्लाको सिद्धनाथ माध्यमिक विद्यालय, जोगवुडामा भवन अभावका कारण डोटी, डडेल्धुरा र बैतडी जिल्लाबाट आएका १६ जना छात्र र १९ जना छात्रा गरी ३५ जना आपाङ्गता भएका विद्यार्थीहरूलाई व्यवस्थापन गर्न कठिनाइ भएको हो ।

दुई / तीन कक्षाका विद्यार्थीहरुलाई एउटै कोठामा राखेर अध्यापन भइरहेकोले पढाई प्रभावकारी हुन नसकेकको कक्षा ८ मा अध्ययनरत दृष्टिविहिन विद्यार्थी किशोर बोहराले गुनासो गर्नु भयो ।

उहाँले सम्बन्धीत सरोकारवालाहरुले आपाङ्गता भएका (आखा नदेख्ने र कान नसुन्ने) विद्यार्थीहरुको समस्यालाई ध्यानमा राखेर चाडो भन्दा चाडो समस्याको सामाधान गरी दिन समेत आग्रह गर्नु भयो ।

विद्यालयमा भवन अभावका कारण एउटै कोठामा राखेर अध्यापन गराउने गरिएको र छात्राबासमा पनि कोठा अभावका कारण बस्नका लागि समस्या हुने गरेको कक्षा ९ मा अध्ययनरत विद्यार्थी सरीता भण्डारीले गुनासो गर्नु भयो ।

उहाँले भन्नु भयो– ‘विद्यालयमा कान नसुन्ने र आँखा नदेख्ने विद्यार्थीलाई सपाङ्ग विद्यार्थीहरुसँगै एउटै कक्षा कोठामा राखेर अध्यापन गराइन्छ । साँझ छात्राबासमा फर्किदा समेत भवन तथा कोठाको अभावमा एउटै कोठामा सबैले बस्नु पर्ने बाध्यता छ ।’

कक्षा कोठाको अभावमा आपाङ्गता भएका विद्यार्थीहरुको पठन पाठनमा समस्या भएको र छात्राबासको राम्रो व्यवस्था नभएकोले आवसका लागि  समेत समस्या भएको विद्यालयका स्रोत शिक्षक केहरसिंह वडैलाले बताउनु भयो ।

कक्षा कोठा अभावका कारण दुई / तीन कक्षामा अध्ययनरत विद्यार्थीहरुलाई एउटै कक्षा कोठामा राखेर पठनपाठन गराइरहेको शिक्षक बडैलाको भनाइ छ ।

आपाङ्गता भएका विद्यार्थीहरुलाई अध्यापन गराउनका लागि साविकको जिल्ला शिक्षा कार्यालयदेखि हालको स्थानीय सरकारलाई भवनको माग गरेको वर्षौँ भइसक्दा समेत अहिलेसम्म सुनुवाई हुन नसकेको शिक्षक बडैलाले गुनासो गर्नु भयो ।

आपाङ्गता भएका विद्यार्थीहरुका लागि भवन अभाव भएको आफूलाई जानकारी नै नभएको परशुराम नगरपालिकाका प्रमुख भरत वडायर जोशीले बताउनु भयो ।

उहाँले आपाङ्गता भएका बालिकालिकाहरुको शिक्षा र आवासका लागि नगरपालिकाले जतिसक्दो चाँडो भवन निर्माण र छात्रावासको व्यवस्थाका लागि पहल गर्ने बताउनु भयो ।


भूपेन्द्र बिष्ट