समाचारहरू

विद्यालयमा भवनको अभावले नयाँ शैक्षिक सत्र सुरू भएको दुई महिना बितिसक्दा पनि विद्यार्थीहरू चौरमा अध्ययन गर्न बाध्य भएका छन् ।

ताँजाकोट गाउँपालिका–३ स्थित धर्मोदय माविमा कक्षा कोठाको अभावले विद्यार्थीहरू खुला चौरमा अध्ययन गर्न बाध्य भएको सो विद्यालयका शिक्षक दिपक भण्डारीले गुनासो गरे ।

कक्षा कोठा अभावले गर्दा सो विद्यालयका विद्यार्थीहरू खुल्ला चौरमा अध्ययन गर्न बाध्य भएको शिक्षक भण्डारीले बताए ।

हावाहुरी चल्दा, चर्को घाम लाग्दा र पानी परेको बेला पठनपाठन बन्द हुने गरेको कक्षा तीनमा अध्ययनरत छात्रा बेलमती जैशीले बताइन् ।

विद्यार्थी चाप धेरै भए पनि शिक्षक दरबन्दी कम हुँदा निजी श्रोतबाट शिक्षक व्यवस्था गरिरहेको उक्त विद्यालयमा भवनको अभावले गर्दा साना कक्षाका विद्यार्थीहरू बाहिर पढ्न बाध्य रहेको गुनासो आएको छ ।

कक्षा कोठा अभाव भएर विद्यार्थीहरूलाई अब गर्मी बढेसँगै अध्ययन गर्न कठिन हुने र बर्खामा पानी पर्दा पढाई के गर्ने भन्ने चिन्ता थपिएको छ ।

गत वर्षसम्म जेनतेन चलाइए पनि यसपालि कक्षा कोठाको अभावले दुई–तीन ओटा कक्षाहरू चौरमा सञ्चालन गर्नु बाध्यता रहेको विद्यालयका प्रधानाध्यापक हरिप्रसाद भुवाईले बताए ।

अझ कक्षा दुईलाई त बेन्च राखेर मञ्चमा अध्ययन गराउनु परेको प्रधानाध्यापकको भनाई छ । यतिखेर सो विद्यालयलाई शिक्षक दरबन्दी कम, भवन पनि सीमित र जीर्ण भइसकेकाले कठिनाई सिर्जना भएको छ ।

भवन अभावले विद्यार्थीलाई पठनपाठनमा समस्या भएको र त्यसका लागि स्थानीय तथा प्रदेश सरकारसँग भवन निर्माणका लागि योजना माग गरिएको प्रधानाध्यापकले बताए ।

भवन धेरै भएपनि पुराना र प्रयोग गर्न नसकिने भएका कारण पठनपाठनमा अवरोध सिर्जना भएको ताँजाकोट गाउँपालिका प्रमुख प्रशासकीय अधिकृत विष्णुबहादुर शाहीले बताए ।

अहिले पनि प्रदेश सरकारबाट नयाँ भवन निर्माणको कार्यक्रम रहेको र भवन बनेमा समस्या समधान हुने अधिकृतले बताए ।

नन्द सिंह