समाचारहरू

गुलरिया र बारबर्दिया नगरपालिका जोड्ने पुल समयमा नबनेका कारण स्थानीय बिरामीलाई सास्ती भएको छ । २०७९ असोज २२ गते आएको बाढीले पुलको तीन ओटा स्पान बगाए पनि हालसम्म निर्माण हुन नसक्दा आवतजावत गर्न डुङ्गाको प्रयोग गर्नु परेको छ ।

बारबर्दिया नगरपालिका–११ की टिकारानी थारुले पुल नहुँदा गुलरिया अस्पताल जान र अन्य सरकारी कार्यालयमा जाँदा निकै समस्या भोग्नु परेको बताउनु भयो । उहाँका अनुसार पुल भत्किएपछि पाँच मिनेटको बाटो पनि आधा घण्टा लाग्ने गरेको छ । 'बिरामी हुँदा वा अन्य काममा जाँदा धेरै समय खर्च हुन्छ । नदीमा आवतजात गर्न समेत पनि पैसा तिनुपर्छ' - उहाँले भन्नुभयो ।

त्यसैगरी बारबर्दिया नगरपालिका–१० की अनिता थारुले बिरामी भएर अस्पताल जानुपरेमा नदी तरेर जानुपर्ने बताउनु भयो । रातमा कोही बिरामी हुँदा झनै समस्या हुने र डुङ्गा चढेर आउन वा जान जोखिम हुने उल्लेख गर्नुभयो । डुङ्गा चढेर हिँड्न समेत झन् समस्या भएको उहाँको भनाइ छ । बारबर्दिया नगरपालिका–४, रामपुरका सुशिल ज्ञवालीले डुङ्गामा यात्रा गर्दा निकै जोखिम हुने गरेको बताउनु भयो । उहाँले भन्नुभयो - ‘घर आउँदा जाँदा साथमा मोटरसाइकल र दुई जना छोरा हुन्छन् । मोटरसाइकलको सुरक्षा गर्ने की छोराहरूको । मनमा सधैँ त्रास हुन्छ । नदी वारपार गर्न समेत जोखिम हुन्छ ।’

१६ करोड ६८ लाख लागतमा निमार्ण भएको करिब ४ सय २५ मिटरको पुल हस्तान्तरण नहुँदै ०७४ साउन २९ गते पुलका दुई ओटा स्पान भासिएको थियो । पुलको स्पान भासिएको भए पनि पुलबाट साना सवारीसाधन, मोटरसाइकल, साइकल, अटो सहज रूपमा ओहरदोहर गर्दै आएका थिए । ०७९ असोज २२ गते आएको बाढीले पुलको तीन टा स्पान बगाए पछि आवत जावत नै पूर्णरुपमा बन्द भएको हो ।

बाढीले पुल बगाएको पनि सात वर्षभन्दा बढी समय हुँदा समेत निमार्ण हुन नसकेको बारबर्दिया नगरपालिका–५ का वडा अध्यक्ष लालबहादुर चौधरी बताउनुहुन्छ । उहाँले पटक पटक मन्त्री र सांसदले पुल निर्माण गर्ने प्रतिबद्धता गरे पनि हालसम्म पुल निर्माण हुन नसकेको बताउनु भयो ।

बाारबर्दियाका नगरपालिकाका प्रमुख छविलाल थारुले पुल निर्माणको लागि यस वर्ष १ करोड रुपियाँ सङ्घीय सरकारले बजेट छुट्याएको जानकारी दिनुभयो । उहाँले पुल भत्किएपछि पुल निमार्ण गर्ने कम्पनीलाई अख्तियारमा मुद्दा परेको कारण सो स्थानमा पुल बन्न नसक्ने भन्दै सरकार बारबर्दिया नगरपालिका–११ र गुलरिया नगरपालिका–४ जोड्न सोही नदीको आसपासमा बबई नदी पुल भनेर योजना अगाडि बढाएको भए पनि सरकारले व्यवस्थापन गरेको बजेट अपुग रहेको बताउनु भयो । ‘सरकारले बबई नदीमा पुल हाल्नका निम्ति डिपीआरको काम अगाडि बढाएको छ । तर सरकारले व्यवस्थापन गरेको बजेट पुल निमार्णका काम अगाडि बढ्न सकेको छैन । पुल निमार्ण गर्नका लागि थप बजेटको व्यवस्था र पुल निमार्णको काम अगाडि बढाउन सम्बन्धित निकायमा आग्रह गरिरहेको छु ।’

बारबर्दिया नगरपालिकाले डुङ्गा सञ्चालनको लागि २१ लाखमा ठेक्का दिएको छ । डुङ्गामा आवतजावत गर्दा मोटरसाइकलको १५ रुपियाँ, साइकलको १० रुपियाँ, बाख्राको १० रुपियाँ, कुखुराको ३ रुपियाँ र मानिसको १० रुपियाँका दरले रकम तिर्नुपर्ने बाध्यता रहेको छ । बिरामी, विद्यार्थी, सर्वसाधरण, कर्मचारी र शिक्षक गरेर दैनिक १ हजार भन्दा बढी मानिसहरू डुङ्गामा आवतजावत गर्छन् ।

प्रकाश पौडेल