समाचारहरू

भक्तपुर जिल्लाका ३४ ओटा मतदानस्थल सुरक्षाका दृष्टिले सम्वेदनशील रहेको छ । जिल्ला सुरक्षा समितिका संयोजक एवम् प्रमुख जिल्ला अधिकारी द्रोण पोखरेलले भक्तपुरका ७८ मतदानस्थलमध्ये ३४ ओटा मतदानस्थल सम्वेदनशील रहेको जानकारी दिए ।

बाँकी ४४ ओटा मतदानस्थल सामान्य रहेको उनले जानकारी दिए । सुरक्षा निकाय, मुख्य निर्वाचन अधिकृत तथा निर्वाचन अधिकृत कार्यालयले मतदान केन्द्रहरूको स्थलगत अध्ययन अवलोकनपछि शान्ति सुरक्षा, राजनीतिक दलहरूको प्रभाव एवम् मतदान केन्द्र र मतदाताको दूरीको आधारमा सम्वेदनशील र सामान्य मतदानस्थल छुट्याइएको उनले बताए ।

सुरक्षित ढङ्गले निर्वाचन गर्न केन्द्रीय सुरक्षा योजनाअनुसार भक्तपुरमा पनि सुरक्षाकर्मीहरू परिचालन गरिएको प्रजिअ पोखरेलले बताए ।

भक्तपुरका ७८ मतदानस्थलमा २ सय ९ मतदान केन्द्र रहेका छन् । एउटा मतदानस्थलमा दुई ओटादेखि पाँच ओटासम्म मतदान केन्द्र रहेका छन् ।

एउटा मतदान केन्द्रमा बढीमा १ हजार जना मतदाताले मतदान गर्ने व्यवस्था मिलाइएको जिल्ला निर्वाचन कार्यालय भक्तपुरका प्रमुख उमेश राईले जानकारी दिए ।

भौगोलिक अवस्था एवम् मतदाता र मतदान केन्द्रको दूरी बढी भएका र साँघुरो ठाउँमा कम्तीमा ५ सय मतदाताको लागि एक मतदान केन्द्र निर्धारण गरिएको छ ।

भक्तपुरमा कुल १ लाख ७८ हजार ९५ जना मतदाता रहेका छन् । जसअनुसार निर्वाचन क्षेत्र नं. १ मा ९४ हजार १६४ र क्षेत्र नं. २ मा ८३ हजार ९३५ मतदाता रहेको जिल्ला निर्वाचन कार्यालयले जनाएको छ ।

सविना केसी