समाचारहरू

सिद्धलेक गाउँपालिका–२ बिसटारीकी ४७ वर्षीया हिरादेवी सिलवालले आफूलाई कथित बोक्सि आरोप लगाएर कुटपिट गर्ने छोरीहरूसहित पतिलाई कारबाही गर्न पुस २४ गते इन्सेक जिल्ला प्रतिनिधि मार्फत आग्रह गर्नु भएको छ । 

पति ५० वर्षीय वीरबहादुर सिलवाल, छोरीहरू २७ वर्षीय सीता सिलवाल र २४ वर्षीय सिर्जना सिलवालले पुस १७ गते बिहान बोक्सी बुढी भनेर कुटपिट गरेपछि आफू घाइते अवस्थामा भागेर ज्यान जोगाएको पीडितले बताउनुभयो ।

कुटपिटबाट घाइते पीडितले जिल्ला अस्पतालमा उपचार गरी पुस १८ गते घर जाँदा घरभित्र बस्न नदिएर दुई रात चिसोमा बाहिर बस्नुपरेपछि पुस २० गते जिल्ला प्रहरी कार्यालयमा उजुरी दिनुभएको छ । 

घटनाको अनुसन्धान भइरहेको जिल्ला प्रहरी कार्यालयका इन्स्पेक्टर रमेश थापाले बताउनुभयो । हाल माइतिपक्षको संरक्षणमा बस्नुभएका पीडितले आफूले हुर्काएको सन्तान र आफ्नो भनिएको पतिले घाइते हुनेगरि कुटेर घर निकाला गरेकोले न्याय दिलाउन इन्सेकसँग आग्रह गर्नु भयो । 

पीडितको उपचार धादिङ अस्पताल ओसिएमसिमा पुस २४ गते इन्सेकको पहलमा गरियो । 

घरबाट विस्थापित पीडित माइती घरमा आश्रय लिएर बस्नुभएको छ । 

सीताराम अधिकारी