बैंकमा सामाजिक सुरक्षा भत्ता बुझ्नेको भीड, सेवाग्रहीलाई सास्ती

रोल्पाको सुनछहरी गाउँपालिकामा रहेको नेपाल एसबीआई बैकमा सामाजिक सुरक्षा भत्ता बुझ्नेको भीड लाग्ने गरेको छ । जसकारण सेवाग्राहीहरु मर्कामा परेका छन् ।

स्थानीय सरकार स्थापनासँगै नेपाल सरकारबाट प्राप्त हुने विभिन्न खाले सामाजिक सुरक्षा भत्ताहरु बैंकिङ प्रणालीबाट भुक्तानी गर्ने गरिएको छ । जस प्रकृया अनुसार स्थानीइ तहमा रहेको नेपाल एसबीआई बैंकबाट सामाजिक सुरक्षा भत्ता वितरण हुँदै आएको छ । स्थानीय तहमा रहेको एकमात्र नेपाल एसबीआई बैंकमा सामाजिक सुरक्षा भत्ता बुझ्नेको भीड लाग्ने गरेको छ ।

भौगोलिक हिसाबले जिल्लाकै विकट मानिने सुनछहरी गाउँपालिका क्षेत्रफलको हिसाबले जिल्ला सदरमुकाम लिवाङ देखि करिब ४८ किलोमिटर उत्तर पुर्वमा पर्दछ । यो स्थानीय तह जिल्लाकै सबैभन्दा ठुलो स्थानीय तह हो । जहाँ सात वटा वडाहरु रहेका छन् ।

भौगोलिक हिसाबले अधिकांश वडाबाट पालिकासम्म आउन झण्डै एक दिन लाग्ने गर्दछ ।  भरपर्दो सडक सञ्जालको पहुँच नभएकै कारण सामाजिक सुरक्षा भत्ताकै निम्ती लामो बाटो हिडेर बैंकसम्म आएका सेहाग्राहीहरुले बैंकमा हुने लामो भीडका कारण हैरानी खेप्नु परिरहेको छ ।

बैंकमा लामो समय पालो पर्खनुपर्ने बाध्यता रहेको सुनछहरी गाउँपालिका–३ का ७६ वर्षीय पन्थलाल घर्तीले गुनासो गर्नुभयो । समयमै काम नबन्दा बाटोमै बास बस्नु पर्ने बाध्यता समेत रहेको सुनछहरी गाउँपालिका– २ भित्रीगाम घोवाखोलाका ज्येष्ठ नागरिक पुर्णसिंङ बुढाले बताउनु भयो ।

यातायातको असुविधा, लामो समयको पैदल यात्रा र बैंकमा हुने लामो भीडले वृद्ध तथा अपाङ्गता भएका व्यक्तिहरुलाई सास्ती हुने गरेको उहाँले बताउनु भयो ।

वृद्धवृद्धाहरूलाई आफूले पाएका सामाजिक सुरक्षा भत्ता सुरक्षित घरमा पु¥याउन समेत जोखिम देखिएको स्थानीयले बताएका छन् । पैदल यात्रा हुँने हुँदा कसैले पैसा लुट्ने हुन कि भन्ने डर हुने गरेको सुनछहरी गाउँपालिका– ४ का ज्येष्ठ नागरिक रामसर घर्तीले बताउनु भयो ।

बैकका प्रमुख सन्तोष सुवेदीले भत्ता वितरणको समयमा सबैजना एकैपटक भत्ता बुझ्न आउने हुँदा भिडभाड हुने गरेको बताउनु भयो ।

उक्त विषयमा गाउँपालिका कार्यविधि बनाएर बैंकका कर्मचारीहरुलाई वडाहरुमा घुम्ती टोलीको रुपमा पठाएर समामाजिक सुरक्षा भत्ता वडाबाटै वितरण गर्ने योजना भएपनि बैंकलाई धेरै पटक आग्रह गर्दा समेत बैंकले जनशक्ति अभावको कारण देखाएको सुनछहरी गाउँपालिका अध्यक्ष धनबहादुर पुन मगरले बताउनु भयो ।


तिलक घर्ती मगर