न्यायका लागि पहल गरिदिन बेपत्ता पारिएका व्यक्तिका परिवारद्वारा इन्सेकसमक्ष आग्रह

साबिक पिपलडाडाँ गाविस-२ हाल चौतारा सागाचोकगढी नगरपालिका-६ की सीता बस्नेतले बेपत्ता पतिको न्यायका लागि पहल गरिदिन ०८० असोज १४ गते इन्सेकसमक्ष आग्रह गर्नुभएको छ ।

सीता बस्नेतकी पति कृष्णबहादुर बस्नेत प्रहरी सेवामा कार्यरत हुनुहुन्थ्यो । प्रहरीमा जागिरे भएको आरोपमा ०६१ फागुन १३ गते बिहान काठमाडौँ जान लाग्दा तत्कालिन बिद्रोही नेकपा माओवादीले साविक साँगाचोक गाविस-४ स्थित भञ्ज्याङबाट अपहरण गरी बेपत्ता बनाएका थिए ।

अपहरण भएका भाइको खोजी गर्ने क्रममा दाजु कुलबहादुर बस्नेत ०६१ फागुन १८ गते साँगाचोक स्थित मानेभञ्ज्याङमा पुग्दा भाइ कृष्णबहादुर बस्नेतलाई आँखामा पट्टी र दुवै हात पछाडि बाँधेर चउरमा लडाएर राखेको दृश्य दाजु कुलबहादुरले देख्नुभएको थियो । तर माओवादीको घेरामा रहेका भाइलाई भेट्न भने नपाएको कुलबहादुरको भनाइ छ ।

भाइलाई भोलि पठाइदिउँला भन्ने आश्वासन माओवादीले उहाँलाई दिएका थिए । भाइ भोलि घर आउँछ भन्ने आशामा खुशि हुँदै दाजु कुलबहादुर त्यसै दिन घर फर्किनुभएको थियो । कुलबहादुरलाई माओवादीले दिएको आश्वासन पुरा भएन, बरु ०६३ असार १३ गते वक्तव्य मार्फत जनताले कुटपिट गरी मारेको बताए । कृष्णबहादुर बस्नेतलाई ०६१ फागुन १८ गते माओवादीकै कब्जामा देखेका आफन्तले त्यसपछि कहिल्यै देख्न पाएनन् । सीता बस्नेत ०६१ फागुन १९ गतेपछि पनि पति भेट्न पाइन्छ की भनी तीन पटक मानेभञ्ज्याङ पुग्नुभयो, तर पनि पति भेट्न नपाएको उहाँको पीडा छ ।

बेपत्ता पतिको खोजिका लागि जिल्ला प्रशासन कार्यालय, जिल्ला प्रहरी कार्यालय, राष्ट्रिय मानव अधिकार आयोग र सरकारले गठन गरेको बेपत्ता आयोगमा समेत आफूले निवेदन दिएको तर हालसम्म न्याय नपाएको सीता बस्नेतको भनाइ छ ।

इन्सेक बागमती प्रदेश कार्यालयका प्रलेख अधिकृत सोम नेपाली र इन्सेक सिन्धुपाल्चोक जिल्ला प्रतिनिधि असोज १४ गते बेपत्ता परिवारको अवस्था जानकारी लिन सीता बस्नेतको घर पुग्दा उहाँले न्यायका लागि पहल गरिदिन आग्रह गर्नुभएको हो ।

Photo_080-6-14_Sindhupalchok1


नातिबावु धिताल