समाचारहरू

२९ वर्षीया र ३० वर्षीया दुई जना महिलाहरूलाई राम्रो जागिर लगाइदिने प्रलोभन देखाएर भारतको बाटो हुँदै कुवेत लैजाँदै गरेको अवस्थामा माइती नेपालसँगको सहकार्यमा प्रहरीले बेलहिया नाकाबाट फागुन २१ गते उद्दार गरी एक जना आरोपितलाई बेलहियाबाटै गिरफ्तार गरेको छ ।

प्रहरीका अनुसार बुटवल उमनपा-११ बुद्धनगरकी ५० वर्षीया फुलमाया चौधरीलाई गिरफ्तार गरिएको र उनकी २६ वर्षीया छोरी प्रमिला चौधरी फरार रहेकी छन् ।

पीडित महिलाहरूलाई कुवेतमा राम्रो काम लगाइदिने प्रलोभन देखाएर आरोपितहरूले बुटवलबाट दिल्ली जाने बसमा चढाएर बेचबिखनको लागि लैजान लागेको प्रहरीको आरोप छ ।

कुवेत जान हिँडेका महिलाहरूसँग वैदेशिक रोजगारीमा जाँदा चाहिने पासपोर्ट, नागरिकतालगायतका कागजात नभएकाले बेचविखनका लागि लैजान लागेको र कुवेत पठाउने बहाना मात्र भएको जिल्ला प्रहरी कार्यालयका डिएसपी डिल्लीनारायण पाण्डेले बताए ।

त्यसैगरी ३४ वर्षीया दुई जना महिलाहरूलाई राम्रो जागिर लगाइदिने प्रलोभन देखाएर भारतको बाटो हुँदै कुवेत लैजाँदै गरेको आरोपमा केआई नेपालसँगको सहकार्यमा प्रहरीले बेलहिया नाकाबाट फागुन २० गते उद्दार गरेको छ ।

उक्त घटनाका आरोपितहरू कञ्चन गाउँपालिकाका ३७ वर्षीया मीना बिक र कञ्चन गाउँपालिका हरैयाका ४५ वर्षीय राजु क्षेत्री फरार रहेको प्रहरीले जनाएको छ ।

पीडित महिलाहरूलाई कुवेतमा राम्रो काम लगाइदिने प्रलोभन देखाएर आरोपितहरूले बेचबिखनको लागि लैजान लागेको प्रहरीको आरोप छ ।

कुवेत जान हिँडेका महिलाहरूसँग वैदेशिक रोजगारीमा जाँदा चाहिने पासपोर्ट, नागरिकतालगायतका कागजात नभएकाले बेचबिखनका लागि लैजान थालेको र कुवेत पठाउने बहाना मात्र भएको जिल्ला प्रहरी कार्यालयका डिएसपी डिल्लीनारायण पाण्डेले बताए ।

रीमा बि.सी.