बेचबिखन प्रयास घटनाका आरोपितविरुद्ध उजुरी

  ०७८ असार १५ गते

१६ वर्षीया बालिका र २० वर्षीया युवतीलाई बेचबिखन गर्न खोजेको आरोपमा पीडित पक्षले झापा जिल्ला बिर्तामोड नपा–९ का २० वर्षीय लक्ष्मी दास र सुनसरी जिल्ला इटहरी नपा–१२ का १९ वर्षीय खुश्वु विश्वकर्माविरुद्ध जिल्ला प्रहरी कार्यालय पर्सामा असार १३ गते उजुरी दिएको छ ।

आरोपितद्वयलाई प्रहरीले बीरगंज महानगरपालिका–१६ इनर्वाबाट असार १२ गते गिरफ्तार गरेको जिल्ला प्रहरी कार्यालय पर्साका डिएसपी ओमप्रकाश खनालले जानकारी दिनु भयो ।

आरोपितहरूले पीडित बालिका र युवतीलाई बीरगंज शहरमा पुर्‍याइ अर्केष्ट्रामा आकर्षक तलब हुने काम लगाइदिने प्रलोभन देखाई बीरगंज बसपार्कसम्म ल्याएको आरोप छ ।

बीरगंजबाट काम गर्ने ठाउँसम्म जानु पर्ने भन्दै झुक्याएर भारतको बिहार राज्यको छौँडादानो भन्ने स्थानमा पुर्‍याएका थिए ।

त्यहाँ मोबाइल फोन खोसी एक कोठामा राखी भारतकै अन्य स्थानमा पठाउने तयारी भइरहेको बेला नेपाल र भारतीय प्रहरीले उद्धार गरेको हो ।

पीडित बालिका र युवतीको स्वास्थ्य परीक्षण नारायणी अस्पताल बीरगंजमा असार १३ गते गरिएको डिएसपी खनालले बताउनु भयो ।


कृष्णचन्द्र लामिछाने