समाचारहरू

राम्रो जागिर लगाई दिने प्रलोभन देखाएर भारतको बाटो हुँदै कुवेत लैजाँदै गरेको अवस्थामा प्रहरीले रूपन्देही जिल्लास्थित बेलहिया नाकाबाट माघ १८ गते तीन महिलाको उद्धार र पाँचथर जिल्ला फत्तिम गाविस-९ की ३७ वर्षीया राजकुमारी चोम्जोङलाई गिरफ्तार गरेको छ ।

भारतको बाटो हुँदै घरेलु कामदारको रूपमा कुवेत लैजाँदै गर्दा रौतहट जिल्लाकी ३१ र २४ वर्षीया दुई र बाराकी २३ वर्षीया एक महिलालाई बेलहिया नाकाबाट प्रहरीले उद्धार गरेको हो ।

वैदेशिक रोजगारीका लागि कुवेत जान भन्दै हिँडेका महिलाहरूसँग पासपोर्ट, नागरिकतालगायत आवश्यक कागजात केही पनि नभएको र पीडित महिलाहरू तथा रोजगारीमा लैजाने व्यक्तिका बिचमा राम्रो चिनजान समेत नभएकोले मानव बेचबिखन हुन लागेको आशङ्कामा आरोपितलाई गिरफ्तार र पीडित महिलालाई उद्धार गरिएको प्रहरीले जनायो ।

घटनामा संलग्न रहेको अरोपित ठेगाना नखुलेका अन्दाजी ४० वर्षीय भिमबहादुर मगर र अन्दाजी ३५ वर्षीय भिम दुलाल फरार रहेको प्रहरीले जनाएको छ । फरार आरोपितद्वयको खोजी कार्य भइरहेको जिल्ला प्रहरी कार्यालय, महिला तथा बालबालिका सेवा केन्द्रका सई लक्ष्मण बिकले जानकारी दिए ।

रीमा बिसी