समाचारहरू

२० वर्षीया र १९ वर्षीया दुई महिलासहित एक वर्षीय एक बालकलाई बेचबिखनको उद्देश्यले भारत पुर्‍याएको आरोपमा प्रहरीले दुप्चेश्वर गाउँपालिका–१ घ्याङफेदीका २५ वर्षीय सूर्यमान तामाङलाई भदौ ३ गते गिरफ्तार गरेको छ ।

अर्का आरोपित फुर्वाछिरिङ तामाङलाई भारततर्फ जाँदै गर्दा कपिलवस्तु जिल्लाको कृष्णनगर नाकाबाट साउन ३० गते गिरफ्तार गरी नुवाकोट ल्याएर मानव बेचबिखन तथा ओसारपसार मुद्दामा साउन ३२ गते अदालतबाट म्याद थप गराएर अनुसन्धान गरिरहेको जिल्ला प्रहरी कार्यालयका इन्स्पेक्टर विनोद ढकालले जानकारी दिनु भयो ।

पीडितहरूलाई आरोपितले साउन १५ गते भारततर्फ लगेको भन्दै उनीहरूको परिवारले साउन १८ गते जिल्ला प्रहरी कार्यालयमा खोजतलासको निवेदन दिएका थिए ।

खोजतलासको क्रममा आरोपित गिरफ्तार गरिएको प्रहरीले जनाएको छ । सो घटनामा संलग्न दुप्चेप्वर गाउँपालिका–१ कै ३१ वर्षीय मङ्गले तामाङ फरार रहेको इन्स्पेक्टर ढकालले जानकारी दिनु भयो । पीडित महिला र बालकको अवस्था भने हालसम्म थाह हुन नसकेको प्रहरीले जनाएको छ ।

नवदीप श्रेष्ठ