समाचारहरू

चौतारा नपा-२ गिदानेकी १९ वर्षीया सरिता मगरलाई हत्या गरेर जङ्गलमा पुर्‍याई झुण्ड्याएको आरोपमा ५२ वर्षीय तेजबहादुर थापामगर विरुद्ध ०७३ भदौ ६ गते जिल्ला प्रहरी कार्यालयमा उजुरी दर्ता भएको छ ।

सरितालाई साउन २१ गते आरोपितले कुटपिट गरी हत्या गरेर चौतारा नपा-२ गिदाने स्थित आफेखोला चिसापानी भन्ने जङ्गलको एउटा बुटोमा लगेर झुण्ड्याएको आरोप छ । पीडितको पति वैदेशिक रोजगारीका लागि विदेश गएका बेला सासू र ससुराले सधैजसो कुटपिट गरी शारीरिक तथा मानसिक यातना दिने गरेको माइती पक्षको भनाइ छ ।

सरिताको शव साउन २२ गते बिहान गाउँलेले फेला पारेका थिए । गाउँलेहरूकाअनुसार जीउमा चोटपटक लागेको र आधी शरीर भुइँमा लत्रिएको अवस्थामा शव भेटिएको थियो ।

लासको साउन २२ गते नै चौतारा अस्पतालमा पोष्टमार्टम भएको थियो । पोष्टमाटम रिपोर्टमा मृतकको पेटमा तीन महिनाको गर्भ समेत भएको उल्लेख गरिएको जिल्ला प्रहरी कार्यालयका इन्स्पेक्टर केदार बस्नेतले बताए ।

उनका अनुसार आरोपितलाई गिरफ्तार गर्न प्रहरी घटनास्थल तर्फगएको छ । आरोपितविरुद्ध भोटसिपा गाविस-९ बस्ने सरिताका ४० वर्षीय बाबु ख्यामबहादुर मगरले जिल्ला प्रहरी कार्यालयमा उजुरी दर्ता गराएका हुन् ।

 

नातिबावु धिताल