समाचारहरू

रामेछापको मन्थली नगरपालिका-८, भलुवाजोरका बुबा र आमा गुमाएका बालकहरूलाई अनौपचारिक क्षेत्र सेवा केन्द्र (इन्सेक) ले ०८० कात्तिक ३ गते आर्थिक सहयोग गरेको छ ।

इन्सेकले मानव अधिकार संरक्षण सञ्जाल रामेछाप मार्फत उनीहरूलाई तत्काल राहतको लागि आठ हजार रुपियाँ आर्थिक सहयोग गरेको हो । मानव अधिकार संरक्षण सञ्जाल रामेछापका संयोजक पाण्डव प्रसाईँ तथा इन्सेक जिल्ला प्रतिनिधि नवराज घिमिरेले घरमा नै गएर रकम हस्तान्तरण गर्नुभएको हो ।

सहयोग रकम सञ्जालका संयोजक पाण्डव प्रसाईँले पीडित बालकहरूका माहिलो बुबाका छोरा पदम बसेललाई हस्तान्तरण गरिएको छ ।

गत दशैँको नवमीको दिन आमा गुमाएका चार जना बालकले एक वर्ष नबित्दै पुनः बुबा पनि गुमाएका छन् । बुबा र आमा गुमाएपछि भक्तबहादुर बसेल र गीता बसेकला छोराहरू १८ वर्षका लेखबहादुर बसेल, १६ वर्षका सञ्जीव बसेल, १२ वर्षका सरोज बसेल र आठ वर्षका सन्दीप बसेल बिचल्लीमा परेका हुन् । चार भाइ मध्ये लेखबहादुर र सञ्जीवले बिचमा नै पढाइ छाड्नु भएको छ भने सरोज पाँच र सन्दीप तीन कक्षमा पढ्दै हुनुहुन्छ ।

उहाँहरूलाई तत्काल सहयोगका साथै दीर्घकालीन सहयोग आवश्यक रहेको स्थानीय समाजसेवी शंकर थापाले बताउनु भयो । जसको लागि आफूहरूले प्रयत्न गरिरहेको उहाँले बताउनु भयो ।

‘बुबा र आमा गुमाएका बालकहरूलाई बाँच्नै सङ्कट, पढाइ पनि छुट्ने अवस्था’ शीर्षकमा इन्सेक अनलाइनमा ०८० कात्तिक १ गते फिचर समेत प्रकाशन भएको थियो । उक्त फिचरबाट आफूहरू प्रभावित भइ सहयोगको लागि आएको मानव अधिकार संरक्षण सञ्जाल रामेछापका संयोजक प्रसाईँले बताउनु भयो ।

इन्सेक बागमती प्रदेश कार्यालय, हेटौँडा