समाचारहरू

युवा सङ्घ रुपन्देहीका अध्यक्ष दुर्गा तिवारीको हत्याको विरोधमा बुटवलमा युवा, विद्यार्थीले प्रदर्शन गरेका छन् ।

प्रदर्शनकारीले बुटवलको राजमार्ग चौराहामा रहेको प्रहरी बिटमा आगजनीसमेत गरेका छन् । आगजनीबाट बिटमा क्षति पुगेको प्रहरीले जनाएको छ ।

अहिले बुटवल असान्त बनेको छ । प्रदर्शनकारीले बुटवलको सडकमा टायर बालेर प्रदर्शन गरिरहेका छन् । जसका कारण सडकमा सयौं गाडीहरू लामबद्ध भएका छन् । शङ्कररनगरमा पनि सडक अबरुद्ध पारेर टायर बालिएको छ ।

प्रदर्शनकारीलाई लक्षित गरी प्रहरीको अक्रमणबाट बा १४ च ४११३ नम्बरको गोबिन्द अधिकारीको कारको सिसा फुट्नुका साथै सो कारमा सवार अनेरास्ववियु रुपन्देही जिल्ला सदस्य दिपक चापागाईँको टाउकोमा चोट लागेको छ । उनको उपचारका लागि लुम्बिनी अञ्चल अस्पताल लगिएको छ ।

मृतकको शवलाई देवदह मेडिकल कलेजबाट लुम्बिनी अञ्चल अस्पताल लगिएको प्रहरीले जनाएको छ । अपराधीलाई गिरफ्तार गरी कानुनी कारबाही नगरेसम्म लाश नबुझ्ने र अन्दोलन जारी राख्ने अन्दोलनकारीले जनाएका छन् ।

युवा सङ्घ रुपन्देहीका अध्यक्ष तथा देवदहका युवा व्यवसायी देवदह नपा-६ खैरेनीका ३९ वर्षीय दुर्गा तिवारीको पुस ४ गते साँढे ३ बजे अज्ञात समूहले गोली हानी हत्या गरेको प्रहरीले जनाएको छ ।

रिमा विसी