समाचारहरू

सिञ्जा गाउँपालिकामा रहेको इलाका स्वास्थ्य चौकी नराकोटमा सिटामोलसमेत नपाएर बिरामीहरू रित्तो हात फर्कने गरेका छन् ।

स्वास्थ्य चौकीमा औषधिको अभाव भएका कारणले बिरामीलाई रितो हात फर्काउनु परेको स्वास्थ्य चौकीका इञ्चार्ज प्रेम बमले बताए । 'करिव एक महिनादेखि उपचारका लागि स्वास्थ्य चौकीमा आएका बिरामीलाई पुर्जा लेखिदिएर मेडिकलहरूमा पठाउनु पर्ने बाध्यता रहेको छ ।'-उनले भने ।

सरकारले गुणस्तरीय स्वास्थ्य सेवा दिने नारा घन्काए पनि गाउँका नागरिकले स्वास्थ्य चौकीमा आएर औषधि नपाई रितो हात फर्कनु पर्ने अवस्था रहेको स्थानीय कमला बुढाले दुखेसो पोखिन् । उनले भनिन्-'नाम मात्रको स्वास्थ्य चौकी छ । औषधि किन्न मेडिकल जानु पर्छ । गाउँमा सुत्केरी हुने महिलाले भिटामिन र आइरन चक्की पनि नपाएको धेरै भयो । राम्रो सेवा पाउनु त टाठाबाठाको कुरा हो ।'-उनले भनिन् ।

बिरामी भएको बेला स्वास्थ्य चौकीमा आउँदा सिटामोल समेत नपाइने गरेको उनको गुनासो छ । स्वास्थ्य चौकीमा ३५ प्रकारका औषधि निशुल्क पाउनुपर्ने व्यवस्था भएपनि यहाँको स्वास्थ्य संस्थामा औषधि नभएको स्थानीयको गुनासो छ ।

स्थानीय सरिता बुढाका अनुसार स्वास्थ्य चौकीमा आउँदा औषधि पाइँदैन बरु मेडिकल गएर औषधि लिन सजिलो हुन्छ ।

गाउँका स्वास्थ्य चौकीमा औषधि अभाव भएको विषयमा कसैले पनि ध्यान नदिने गरेको इञ्चार्ज बमको आरोप छ । स्वास्थ्य चौकीमा उपचारका लागि आएका बिरामी औषधि नपाउँदा रिसाएर जाने गरेको उनको भोगाई छ ।

जिल्ला स्वास्थ्य कार्यालय जुम्लाले वर्षो एकपटक औषधि दिने भएका कारणले औषधिको समस्या भएको उनले जानकारी दिए ।

जिल्ला जनस्वास्थ्य कार्यालय जुम्लाका निमित्त प्रमुख किरण शर्माका अनुसार चालु आर्थिक वर्षेखि गाउँपालिकाबाट औषधि खरिदका लागि बजेट विनियोजन भएकोले स्वास्थ्यले औषधि पठाउँदैन ।

सिञ्जा गाउँपालिकाका प्रमुख देवलसिंह रावतले स्वास्थ्य चौकीमा आएको औषधि निजी मेडिकलमा जाने भएका कारण अभाव भएको आरोप लगाए । स्वास्थ्य चौकीमा औषधिको अभाव भएको आफूले जानकारी पाएको भन्दै उनले गाउँपालिकाको तत्काल बैठक बसेर निर्णय गरी तुरून्त अभाव औषधिको परिपूर्ति गर्ने उनको भनाई छ ।

सहयोगीको भरमा स्वास्थ्य चौकी

तातोपानी गाउँपालिकास्थित लाम्रा स्वास्थ्य चौकी कार्यालय सहयोगी मुनप्रसाद चौलागाईको भरमा रहेको छ । ६ जना स्वाथ्यकर्मी कार्यरत रहेको स्वास्थ्य चौकीमा १० दिन देखि अन्य कर्मचारी उपस्थित नभएपछि उक्त कार्यालय सहयोगीको भरमा रहेको हो ।

उनले स्वास्थ्य चौकीमा आएका रूघाखोकी र झाडापखला लागेका सामान्य बिरामीलाई सिटामोल र जीवनजल दिने काम गरिरहेका छन् भने अन्य बिरामीलाई अन्य स्वास्थ्य संस्थामा 'रिफर' गर्ने गरेका छन् ।

उनले भने'-अरू स्वास्थ्य कर्मचारी कोही पनि कार्यालयमा आएका छैनन् ।' किन आएनन् भन्ने आफूलाई जानकारी नभएको उनले बताए ।

प्रत्येक दिन २० देखि ३० जना बिरामी स्वास्थ्य संस्थामा स्वास्थ्य परीक्षणका लागि आउने गरेको कार्यालय सहयोगी मुनप्रसादले बताए । उनका अनुसार स्वास्थ्य चौकीमा झाडापखाला, रूघाखोकी, दम, ज्वरो र टाउको दुख्ने बिरामी आउने गरेका छन् ।

मानदत्त रावल