बाल सुधार गृह व्यवस्थापन नुहँदा सुधार गृहमा राखिएका बालबालिकालाई सास्ती

  ०७९ पुस २७ गते

जिल्लास्थित बाल सुधार गृहको व्यवस्थापनमा सरकारले चासो नदेखाएपछि आफूहरुले सास्ती खेप्नु परेको डोटी जिल्ला बालसुधार गृहमा राखिएका बालबालिकाहरुले गुनासो गरेका छन् ।

२५ जना क्षमता रहेको बाल सुधार गृहमा ३७ जनालाई राखिएको र खाना, बस्न, शौचालय प्रयोग गर्न, लुगा धुन, नुहाउन समेत पानीको समस्या झेल्नु परेको बाल सुधार गृहमा कैद भुक्तान गरिरहनु भएका शिखर नगरपालिकाका १४ वर्षीय बालकले गुनासो गर्नु भयो ।

उहाँले क्षमता भन्दा बढी आश्रीत बालकहरु राख्दा चिसोको समयमा ओडने, ओछ्याउने लुगाको समेत अभाब हुने गरेको दुखेसो पोख्नु भयो ।

बाल न्याय सम्पादन (कार्यबिधि) नियमावली २०७६ परिच्छेद–२ को ६ मा बाल सुधार गृहमा स्वच्छ पिउने पानी, पोषण युक्त खानेकुरा लगायतका न्यूनतम सुबिधाको व्यवस्था हुनु पर्ने उल्लेख छ ।

क्षमता भन्दा बढी बालकहरु राखेका कारण शौचालय जान समेत लाइन लाग्नु पर्ने बाध्यता रहेको केआइ सिंह गाउँपालिकाका १३ वर्षीय बालकले गुनासो गर्नु भयो ।

उहाँले चार ओटा कोठा मात्रै रहेको बाल सुधार गृह, डोटीमा एउटै कोठामा ११ जना बस्नु पर्ने बाध्यता रहेको र खेलकुद, पुस्तकालय, खानेपानीको ब्यबस्थापनका लागि पटकपटक आग्रह गरिएको भए पनि सुनुवाइ नभएको दुखेसो पोख्नु भयो ।

बाल सुधार गृह, डोटीका प्रमुख सानुमाया लिम्बु गुरुङले क्षमता भन्दा बढी बालक आश्रीत रहेका कारण व्यवस्थापनमा समस्या हुँदै आएको बताउनु भयो ।

दुई ओटा कार्यालय सहयोगी रहेको बाल सुधार गृह, डोटीमा कर्मचारी अभाबका कारण पनी व्यवस्थापनमा समस्या हुने गरेको गृहका प्रमुख लिम्बु गुरुङले बताउनु भयो । पिउने पानी, खेल मैदानलगायतका समस्या समाधानका लागि दिपायल सिलगढी नगरपालिकासँग आग्रह गरेको र बाल सुधार गृह भवन निर्माणका लागि जग्गा खरिद प्रक्रिया सम्पन्न भएकोले व्यवस्थापनमा केही सुधार हुने समेत उहाँले बताउनु भयो ।


गणेश जोशी